Եթե մենք դուրս չգայինք պայքարի, այսօր Արցախը ստորագրությամբ հանձնված կլիներ թշնամուն. Վանեցյան

Մենք պարտավոր ենք չհուսահատվել, չհոգնել եւ պայքարել մեր Արցախի համար. Այսօր Արցախի մեր եղբայրներն ու քույրերը ծանր զրկանքներ կրելով ցույց են տալիս, որ պայքարում են մեր ընդհանուր հայրենիքի համար: Այս մասին, այսօր՝ սեպտեմբերի 2-ին, Ազատության հրապարակում լրագրողների հետ զրույցում նշեց «Հայրենիք» կուսակցության ղեկավար Արթուր Վանեցյանը:

«Կորցնելով Արցախը, մենք կորցնելու ենք Հայաստանը: Դրա համար պետք է պայքարենք»,-ասաց նա:

Անդրադառնալով ընդդիմության թույլ տված սխալներին, Վանեցյանն ասաց. «Մդենք երբեւէ չենք խուսափել ընդունել մեր սխալները: Պետք չի խոսել միայն սխալների մասին, սա պայքար է: Այս իշխանություններն առանց որեւէ կարմիր գծերի պայքարում են իրենց իշխանությունը պահելու համար: Եթե իրենք լինեին նորմալ մարդիկ, մի քիչ նամուս, թասիբ ունենային, այսօր կհրաժարվեին իշխանությունից եւ կթողնեին, որ մարդիկ, որոնք ունակ են երկիրը կանգնեցնել ոտքի, այդ մարդիկ անեին այդ ամենը»:

Վանեցյանի խոսքով, այս իրավիճակում կա հնարավորություն առնվազն կանգնեցնել այս մշտական գահավիժումը, մահերի անիվը. «Վստահ եմ, որ ողջ ժողովրդով կկարողանանք դուրս գալ այս վիճակից: Եթե մենք չլինեինք հետեւողական, ժողովրդի հետ չխոսեինք, չբարձրաձայնեինք, դուրս չգայինք պայքարի, այսօր Արցախը ստորագրությամբ, իրավաբանորեն հանձնված կլիներ թշնամուն: Մեր ձեռքբերումներից մեկը կարող եմ դա համարել:

Ձեռքբերումներից մեկն էլ այն է, որ մեր թշնամիները, ամբողջ աշխարհը տեսնում են, որ այստեղ կան մարդիկ, որոնք դեմ են Նիկոլ Փաշինյանի վարած պարտվողական քաղաքականությանը: Մենք ապրում ենք մի տարածաշրջանում, որտեղ եթե մի փոքր թուլացար, քեզ հոշոտելու են»:

Նա նաեւ հավելեց, որ եթե այս իշխնության տեղը նորմալ մարդիկ լինեին, ոչ թե հրաժարական կտային, այլ կգնային կկորեին, ինքնասպանություն կգործեին: