Փաշինյանի շոուները լուրջ չեն ընկալվում իր հովանավորների մոտ

Մինչ Հայաստանում ծանր քաղաքական և սոցիալական իրավիճակ է, Արցախն՝ արդեն 9 ամիս գտնվում է տոտալ շրջափակման մեջ, Նիկոլ Փաշինյանը շաբաթը մի քանի անգամ այցելում է Հայաստանի մի քանի տարբեր տարածաշրջաններ։ Բոլոր այս այցերն իրենց մեջ պարունակում են շոուի տարրեր, Փաշինյանը փորձում է նախ ներքին լսարանին, ապա և իր արտաքին հովանավորներին համոզել, որ դեռ կարելի է իր վրա խաղադրույք անել՝ ոչ միայն քաղաքական, այլ նաև ֆինանսական առումով։

Տևական ժամանակ, ըստ ՔՊ մեր աղբյուրի, Փաշինյանին իր արտաքին հովանավորները տարբեր խողովակներով գումարներ էին ուղարկում, ընդ որում այդ աղբյուրների մեջ բավական շատ է ադրբեջանական և թուրքական ծագումով կապիտալը։ Թշնամի երկրներում հասկանում են, որ այլ ավելի հարմար խամաճիկի, քան Նիկոլ Փաշինյանն է, անհնար է գտնել։

Վերջին շրջանում ֆինանսավորման այլ աղբյուրները ցամաքել են, և Փաշինյանն իր այս շոուները բեմադրում է ավելի շատ դրսի հովանավորների համար՝ ցույց տալու, թե հանրության մեջ մեծ աջակցություն ունի, ժողովուրդը գալիս, համբուրում են, իրենց աջակցությունը հայտնում։ Մի կողմից Փաշինյանն ինքն էլ հասկանում է, որ այս բեմադրությունն իրականում գրոշի արժեք չունի, այն մարդիկ, ովքեր ողջունում և աջակցում են, իրականում բնավ էլ պաշտպանողներ չեն և քաղաքական առումով ռեսուրս չեն, առավելագույնը՝ վիդեոկադր են արտաքին հովանավորների համար։

Այս հանգամանքը լրջորեն վախեցնում է նրան, հատկապես, որ Փաշինյանը մշտապես աչքի է ընկել իր և իր մերձավորների անվտանգության համար վախով։ Ինքն էլ չափազանց շատ կարմիր գծեր է հատել արտաքին աշխարհում, և որևէ ուժային կենտրոն այժմ մտադիր չէ երաշխիքներ տալ Նիկոլ Փաշինյանին։ Դրսի հովանավորներն էլ բնականաբար ապուշ չեն, իրենք են ժամանակին այս հեղափոխություն կոչեցյալի համար այս պատկերը ստեղծել, Փաշինյանին սովորեցրել ինչպես աշխատել մեդիա դաշտում, և այսօր իրենք էլ գիտակցում են, որ այս ամենն ընդամենը չնչին և կեղծ բեմադրություն է, հասկանում են, որ Փաշինյանը խաղացող չէ, հատկապես Արցախում վերջին իրադարձությունները ցույց տվեցին, որ նա կորցնում է իր ազդեցությունը նաև այնտեղ, իսկ Արցախից հետո, ակնհայտ է, որ նույն ճակատագիրը սպասվելու է նաև Հայստանում։

Արտաքին հովանավորները, ուշադիր են ոչ միայն Փաշինայնին, այլ նաև Երևանի ավագանու ընտրություններում Տիգրան Ավինյանին։ Ավինյանի շոուները ևս այս օպերայից են և նա էլ չի կարողանում համոզել, որ լուրջ խաղացող է, թեև շատերը կարծում են, թե կարող են ինչ-որ պահի Փաշինյանին փոխարինել Ավինյանով, սակայն, թե՛ նրա օրեցօր ձախողվող քարոզարշավը և, թե՛ Ավինյանի վրա առկա բազմաթիվ կոմպրոմատները, իր կասկածելի նախասիրությունների մասին տեղեկությունները, վանում են դրսի գործընկերներին։

Գարիկ Ղարիբյան