Արտակարգ դեպք Լոռիում․ փորձել են խոշոր եղջերավոր անասուններ գողանալ, ապա Վրաստանի ուղղությամբ՝ դիմել փախուստի

SHAMSHYAN.com-ի տեղեկություններով՝ օգոստոսի 26-ին արտակարգ դեպք է տեղի ունեցել Լոռու մարզում։ Ժամը 06։50-ի սահմաններում ՀՀ Ներքին գործերի նախարարության Ոստիկանության Տաշիրի բաժին է ահազանգել Արծնի գյուղի վարչական ղեկավար, 43-ամյա Խաչիկ Էգնատոսյանը և հայտնել, որ անհայտ անձը կամ անձինք գողացել են Արծնի գյուղի բնակիչ, 77-ամյա Գևորգ Սերոբյանին պատկանող խոշոր եղջերավոր անասունները։

Ոստիկանները պարզել են, որ որ որ նույն օրը՝ ժամը 02։30-ի սահմաններում անհայտ անձինք գոմի դռան փականը լինգով կոտրելու միջոցով ապօրինի մուտք են գործել անասնագոմ և այնտեղից փորձել են գողանալ Գ.Սերոբյանին պատկանող 4 գլուխ կովերը, 1 գլուխ երինջը և 1 գլուխ հորթը, սակայն իրենց կամքից անկախ հանգամանքներում՝ հանցագործությունը ավարտին չհասցնելով, անասունները թողնելով սահմանապահ զորքերի հսկողության գոտում (Արծնի գյուղի հարակից տարածքում), դեպի Վրաստանի Հանրապետության ուղղությամբ դիմել են փախուստի:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։