Առաջիկայում չափազանց ուշագրավ քարոզարշավ է սպասվում

Մինչ Արցախում ներքաղաքական իրավիճակը սրվում է, Ադրբեջանն էլ օրական մի քանի անգամ խախտում է հրադադարը Հայաստանի և Արցախի ուղղությամբ, նաև միջազգային հանրությանը փորձում է կեղծ տեղեկություններով համոզել, թե հայկական կողմն է պարբերաբար խախատում հրադադարը, փաշինյանական իշխանությունն ինքնամոռաց տարված է Երևանի ավագանու ընտրություններով։

Այսօր՝ օգոստոսի 23-ին, մեկնարկում է ավագանու ընտրությունների պաշտոնական քարոզարշավը, որը տևելու է մինչև սեպտեմբերի 15-ը։ Սեպտեմբերի 16-ին արդեն լռության օր է, իսկ 17-ին Երևանի բնակիչները նոր ավագանի և նոր քաղաքապետ են ընտրելու։ Առաջադրված 14 քաղաքական ուժերից շատերը մասնակցում են պարզապես մասնակցության համար, մի մասն էլ առաջադրվել է ընդամենն ընդդիմադիր քաղաքական ուժերից՝ ձայներ փախցնելու նպատակով։ Գործող իշխանություններն իրենց հիմնական մրցակիցներ են համարում երկու քաղաքական ուժերի՝ նախկին քաղաքապետ Հայկ Մարությանին և «Ապրելու երկիր» կուսակցությանը, որի քաղաքապետի թեկնածուն Մանե Թանդիլյանն է։

Ընդսմին փաշինյանական վարչախմբի հիմնական թիրախներն այդ երկու քաղաքական ուժերն են, որոնց դեմ էլ իսկական արշավ է սկսվել դեռևս քարոզարշավը չսկսած, ուստի կարելի է պատկերացնել, թե այս մեկ ամսվա ընթացքում աղբի ինչ քանակություն է թափվելու այդ երկու ուժերի դեմ։ Եթե Հայկ Մարությանն առանձնապես դեռ հակված չէ լուրջ պատասխանել փաշինյանական վարչախմբին, ապա «Ապրելու երկիրը» չափազանց մարտական է տրամադրված և ոչ պակաս կոշտությամբ պատասխանում է փաշինյանական վարչախմբի կեղծիքներին։ Ինչևէ, մեզ առաջիկայում չափազանց ուշագրավ քարոզարշավ է սպասվում՝ դրանից բխող բոլոր հետևանքներով։

Աննա Սարգսյան