Փաշինյանական վարչախումբը բարոյականության հետ լուրջ խնդիր ունի

Գլխավոր դատախազության ապօրինի ծագում ունեցող գույքի բռնագանձման վարչությունը վերջին օրերին չափազանց բուռն է աշխատում։ ԲՀԿ առաջնորդ Գագիկ Ծառուկյանին, նրա որդիներին, կնոջը, ծնողներին և հարսին հրավիրել են վարչություն։ Նրանց պատկանող գույքի առնչությամբ նշվում է, թե իրականացվել է ուսումնասիրություն, որի արդյունքում ամփոփագիր է կազմվել։

Վերջին օրերի ընթացքում այդ վարչությունը հրավիրել է նախկին քաղաքապետ Երվանդ Զախարյանին, որդուն և դստերը, Ապարանի համայնքապետին, կնոջն ու դստերը, նաև նախկին ոստիկանապետ Ալիկ Սարգսյանի դստերը։ Ամենևին չցանկանալով խախտել որևէ մեկի անմեղության կանխավարկածը, կամ էլ պնդելով, թե նրանք իսկապես անմեղ են, փաստն այն է, որ գործող վարչախումբը ողջ թափով ընկել է ոչ միայն նախկին պաշտոնյաների և քաղաքական գործիչների ետևից, այլ բռնաճնշումների և հետապնդումների է ենթարկում նաև նրանց ընտանիքների անդամներին, ինչն, իհարկե տարիներ շարունակ կարմիր գիծ է եղել, նույնիսկ նախկին իշխանությունների օրոք, և ընտանիքի անդամներին, եթե քրեական պատասխանատվության էլ ենթարկել են, ապա ենթարկել են բացառապես նրանց՝ անձամբ կատարած որևէ արարքի համար։

Այս դեպքում գործ ունենք տարրական վրեժխնդրության և նոր շոուի հետ։ Փաշինյանական վարչախումբը կրկին Հայաստանի դեմ ինչ–որ դավադրություն է նյութում և հանրության ուշադրությունը շեղելու համար թիրախավորել է ոչ միայն նախկին պաշտոնյաներին, այլ նաև նրանց ընտանիքի անդամներին։ Իհարկե գործող վարչախումբը բարոյականության հետ լուրջ խնդիր ունի, որևէ մեկն այլևս չի էլ կասկածում, սակայն ինչու՞ են հենց հիմա թիրախավորել մարդկանց ընտանիքների անդամներին։ Բանն այն է, որ դա տաբու է ողջ հասարակության համար, և հասարակությունը սկսելու է ինքնամոռաց քննարկել բոլոր նման դեպքերը՝ ուշադրությունը շեղելով շատ ավելի կարևոր խնդիրներից, այդ թվում Արցախի հարցում, և Փաշինյանն ու նրա սպասարկուներն այս հանգամանքը հրաշալի հասկանում և օգտագործում են իրենց նենգ ու ճղճիմ խաղերի համար, ուստի բոլորովին էլ պետք չէ թերագնահատել Նիկոլ Փաշինյանի և նրա կողմնակիցների փոքրոգությունը, այս մարդիկ ոչ միայն ապիկար և տգետ են, այլ նաև նենգամիտ և վրեժխնդիր և չունեն բարոյական որևէ արգելանք։ 

Սաթենիկ Սարիբեկյան