Արցախին գումարներ տալու մասին բարձրաձայնելը «իշմար» էր Ադրբեջանին, որ արգելիր այս գումարների փոխանցումը. Կիվիրյան

Այնպես չէ, որ Նիկոլ Փաշինյանի կողմից ասուլիսում հայաստանցիների եւ արցախցիների միջեւ լարվածություն մտցնելը եղավ սպոնտան. Ես ունեմ տեղեկատվություն, որ այդ թիմում դա մշտապես քննարկվել է: Այս մասին NEWS.am-ի հետ զրույցում նշեց քաղաքական վերլուծաբան Արգիշտի Կիվիրյանը:

«Ես ունեմ տեղեկատվություն, որ դեռ ընտրությունների ժամանակ մտածում էին, որ եթե ընտրությունները տեղեկատվական առումով գնան իրենց համար ոչ բրենպաստ սցենարով, ապա այս տրյուկը անեն, այսինքն փորձեն հայաստանցիների եւ արցախցիների միջեւ թշնամանք հրահրել եւ փորձեն շահել տեղական «պողոսների» ձայները: Սրանով Փաշինյանը ցույց տվեց, որ ինքը որեւէ արգելակ չունի, այդ մարդը ընդունակ է գնալ ցանկացած ազգային ստորության, միայն թե  կարողանա շահել տեղի «պողոսների» ձայները եւ ապահովի իր իշխանության շարունակությունը: Ես վստահ եմ, որ սա դեռ ունենալու է շարունակություն: Իր նպատակը հենց այդպիսի դիսկուրս հրահրելն է, եւ դրա համար ընդհանրապես պետք չի մտնել այդ դաշտ»,-ասաց նա:

Անդրադառնալով նրան, որ ասուլիսում Նիկոլ Փաշինյանը հիշատակեց, որ Արցախին մեծ գումարներ են հատկացվում, Կիվիրյանը նկատեց, որ դա Փաշինյանն իր հոր տնից չի տալիս. «Դա ՀՀ քաղաքացիների հարկերից հավաքված գումարներն են: կատարյալ անընդունելի է, որ ՀՀ ղեկավարն այդ տոնով խոսում է հայության որեւէ հատվածի մասին: Կա երկու պատճառ, թե ինչու է նա այս մասին խոսում. Առաջին պատճառն այն է, որ ինքն այդ գումարներով փաստացի գնել է Արցախի ռազմաքաղաքական էլիտային, գնել է նրանց լռությունը, որ նրանք փոխանակ պատերազմից հետո զբաղվեին Արցախի ռազմական ու պետական վերականգնմամբ, զբաղված էին ամեն ինչով, բացի դրանից: Դրա համար էլ Արայիկ Հարությունյանն այսօր քյալամի մեշոկի պես գնացել նստել է վրանի տակ, որովհետեւ չգիտի՝ ինչ անի: Դա ուղերձներից մեկն էր Արցախի ռազմաքաղաքական էլիտային, որ դուք բոլորդ դրանից օգտվել եք, ի՞նչ եք ծպտուն հանում: Երկրորդ ուղերձը ուղղված էր Ադրբեջանին. Դա «իշմար էր» Ադրբեջանին, որ արգելիր այս գումարների փոխանցումը, հայտարարիր, որ Հայաստանն իրավունք չունի այդ գումարները փոխանցել իր տարածքի բնակչությանը: Իմ այս խոսքերի ճիշտ կամ սխալ լինելը պարզ կլինի մոտակա ժամանակ: Եթե մոտակա ժամանակ Ադրբեջանը բարձրացնի այդ հարցը, ուրեմն բոլորի համար պարզ կլինի, որ դա կրկին եղել է Նիկոլ Փաշինյանի պասը ադրբեջանական կողմին»: