ՄԱԿ գլխավոր քարտուղարը Նիգերի զինվորական խռովարարներին կոչ է արել ազատ արձակել երկրի նախագահին

ՄԱԿ գլխավոր քարտուղար Անտոնիու Գուտերիշը Նիգերի խռովարար զինվորականներին կոչ է արել դադարեցնել պետության դեմոկրատական հիմքերի խարխլումը եւ ազատ արձակել  նախագահ Մոհամեդ Բազումին։ Այս մասին նշվել է համաշխարհային կազմակերպության ղեկավարի գրասենյակի հաղորդագրությունում։

Ավելի վաղ Նիգերի Հանրապետության խռովարար զինվորականները հայտարարել էին, որ պաշտոնազրկել են երկրի նախագահ Բազումին եւ փակել հանրապետության սահմանները։

«Գլխավոր քարտուղարը խիստ դատապարտում է երկրում ոչ սահմանադրական իշխանափոխությունը, որը հայտարարվել է հուլիսի 26-ին։ Նա խորապես անհանգստացած է, որ նախագահ Մոհամեդ Բազումը կալանքի տակ է, եւ մտահոգ է նրա անվտանգության եւ առողջական վիճակի առումով։ Նա այս դատապարտելի ակտի բոլոր մասնակիցներին կոչ է անում անհապաղ եւ առանց որեւէ պայմանի ազատ արձակել նախագահին»,- նշվել է ՄԱԿ կայքում հրապարակված հաղորդագրությունում։

Բացի այդ, Գուտերիշը կոչ է արել «անհապաղ դադարեցնել բոլոր գործողությունները, որոնք խափանում են Նիգերի դեմոկրատական սկզբունքները», ինչպես նաեւ ձեռնպահ մնալ բռնության կիրառումից եւ հարգել իրավունքի գերակայությունը։

Ավելի վաղ խռովարարներն իրենց հայտարարությունում, որը տարածել էին ազգային հեռուստատեսության եթերով, երաշխավորել էին տապալված իշխանության ներկայացուցիչների անձեռնմխելիությունը։ Նրանք նաեւ հայտարարել էին, որ Նիգերում մտցվել է համազգային պարետային ժամ 19.00-ից մինչեւ 05.00-ն, բոլոր հաստատությունների աշխատանքը երկրում դադարեցվել է։