Ադրբեջանը մեղադրում է Հնդկաստանին «Հայաստանը ռազմականացնելու» մեջ

Ադրբեջանը մեղադրում է Հնդկաստանին «Հայաստանը ռազմականացնելու» մեջ եւ կոչ է անում վերանայել սպառազինությունների մատակարարման որոշումը։

Ինչպես տեղեկացրել է APA-ն, այս մասին հայտարարել է Ադրբեջանի նախագահի օգնական, Ադրբեջանի Հանրապետության նախագահի աշխատակազմի արտաքին քաղաքականության հարցերի բաժնի վարիչ Հիքմեթ Հաջիեւը Ադրբեջանում Հնդկաստանի Արտակարգ եւ լիազոր դեսպան Շրիդհարան Մադհուսուդհանանի հետ  հանդիպման ժամանակ։

Հաջիեւի խոսքով՝ «այն ժամանակաշրջանում, երբ Ադրբեջանը բանակցություններ է վարում Հայաստանի հետ խաղաղության պայմանագրի մասին, Հնդկաստանի կողմից մահասփյուռ զենքի մատակարարումներն այդ երկիր բացում են Հայաստանի ռազմականացման եւ իրավիճակի սրման ուղին, խոչընդոտում են կայուն խաղաղության եւ անվտանգության հաստատմանը Հարավային Կովկասի տարածաշրջանում»։

«Դա չի համապատասխանում Հնդկաստանի արտաքին քաղաքականությանը՝ հիմնված միջազգային իրավունքի նորմերի եւ սկզբունքների վրա, ինչպես նաեւ Չմիանալու շարժման պատմական «Բանդունգյան սկզբունքներին», որին միացել է Հնդկաստանը»,- ընդգծել է Ադրբեջանի նախագահի օգնականը։ Հիքմեթ Հաջիեւը Հնդկաստանի դեսպանին կոչ է արել «պաշտոնական Դելիին տեղեկացնել ադրբեջանական կողմի լուրջ անհանգստության մասին եւ վերանայել Հնդկաստանի որոշումը Հայաստան մահասփյուռ զենք մատակարարելու մասին»։

Նշենք, որ Ադրբեջանն ինքը պարբերաբար գլուխ է գովում ռազմական բյուջեի ավելացման առնչությամբ։