Փաշինյանն ասուլիս է տալու. ԶԼՄ-ների ցանկը լավ ֆիլտրել են

Հայաստանի վարչապետի պաշտոնը զբաղեցնող Նիկոլ Փաշինյանն այսօր ծավալուն ասուլիս է տալու։ Այս անգամ ասուլիսը կազմակերպել է Բաղրամյան 26-ում, հրավիրվել են մոտ 5 տասնյակ լրատվամիջոցներ, որոնք հնարավորություն կունենան մի քանի ժամ շարունակ հարցեր տալ Նիկոլ Փաշինյանին, ընդ որում, մեր աղբյուրների փոխանցմամբ, ինչպես և նախորդ բոլոր դեպքերում, երբ Փաշինյանը հանդգնում էր պատասխանել լրատվամիջոցների հարցերին, այս անգամ ևս բավականին լուրջ ֆիլտրել են լրատվամիջոցների ցանկը և աշխատել հնարավորինս զերծ մնալ անցանկալի և կոշտ ընդդիմադիր տրամադրված լրատվամիջոցների ներկայությունից։

44-օրյա պատերազմից հետո, տևական ժամանակ Փաշինյանը հանրության հետ հարաբերվում էր միայն մի քանի ամիսը մեկ կազմակերպվող ինքնահարցազրույցներով, երբ հանրային հեռուստաընկերության թղթակիցը կարդում էր նախապես ստացված հարցերը, շատ ժամանակ էլ կոշտ հարցադրումները պարզապես չէին ընթերցում և Փաշինյանը չէր պատասխանում։ Այդուհանդերձ, նույնիսկ հիմա, երբ կանչել են ոչ այնքան կոշտ տրամադրված լրատվամիջոցների ներկայացուցիչներին, շատ դեպքերում կազուսներից խուսափել հնարավոր չի եղել, առավելևս հիմա, երբ ներքաղաքական իրավիճակը լուրջ սրման միտումներ ունի Հայաստանում, իսկ Ադրբեջանը չափազանց կոշտացրել է իր հռետորաբանությունը։

Օրեր առաջ Փաշինյանը «Ֆրանս պրես»-ին տված հարցազրույցում չէր հերքել նոր պատերազմի հավանականութունը, այսօր էլ, երբ Մոսկվայում հանդիպելու են Հայաստանի, Ադրբեջանի և Ռուսաստանի արտգործնախարարները, քննարկելու հայ–ադրբեջանական հարաբերությունների ներկայիս ընթացքը, Փաշինյանը փորձում է իր ասուլիսով ցրել բոլոր վիճահարույց զարգացումները և հանրությանն իբր մեսսիջ տալ, թե իբր ինքը բավականին ամուր է նստած իր դիրքերում։

Իրականությունը սակայն այնքան էլ վարդագույն չէ «Քաղաքացիական պայմանագրի» և նրա պարագլխի համար, Փաշինյանն ինքն էլ հրաշալի տիրապետում է իրավիճակին և գիտակցում է, որ ինչ-որ պահի կարող է ցանկացած տեսակի ֆորս-մաժոր լինել, որը լրջագույն հետևանքներ կունենա։ Իհարկե «Քաղաքացիական պայմանագիրը» մտահոգված է ոչ այնքան Հայաստանին սպառնացող զարգացումներով, այլ սեփական իշխանությունն ամեն գնով պահպանելու ցանկությամբ։