Արևմուտքն արդեն չի էլ թաքցնում Նիկոլ Փաշինյանի վրա դրված խնդիրը

Արևմուտքն արդեն չի էլ թաքցնում Նիկոլ Փաշինյանի և նրա վարչախմբին Ռուսաստանից կտրելու և Հայաստանն իր բոլոր ռեսուրսներով արևմտյան բլոկի մեջ տեղավորելու հարցում իր ցանկությունները։ Նախօրեին Բրյուսելում տեղի է ունեցել Հայաստան-Եվրամիություն գործընկերության կոմիտեի 4-րդ նիստն, որտեղ մի ամբողջ շարք հարցեր են քննարկել։ Քննարկել են նաև մուտքի արտոնագրերի ազատականացման շուրջ երկխոսության մեկնարկի հնարավորությունը։

Եվրամիության պաշտոնյաները նշել են, որ թեև երկխոսության մեկնարկի համար անհրաժեշտ տեխնիկական պահանջները բավարար չափով կատարված են, հարցը պահանջում է նաև քաղաքական որոշում։ Այս համատեքստում Եվրամիությունը շարունակում է խրախուսել Հայաստանին, ակտիվ ներգրավել երկկողմ մակարդակով անդամ պետություների հետ, ինչը նշանակում է, որ Հայաստանի իշխանությունները պետք է բանակցություններ վարեն Եվրամիության գրեթե բոլոր պետությունների հետ, որպեսզի հնարավոր լինի ազատականացնել վիզաները։ Դա չափազանց անհրաժեշտ է Փաշինյանին, նախ այդ դեպքում Հայստանում իրավիճակից դժգոհ մեծաթիվ մի զանգված, որը բավարար ֆինանասական միջոցներ ունի, պարզապես կհեռանա ավելի բարեկեցիկ Եվրոպա։ Բացի այդ, Փաշինյանը հնարավորություն կստանա իր կողմնակիցներին հայտարարելու, թե Հայաստանը տեղավորվում է եվրոպական ծիրի մեջ և նրանց կենսամակարդակն առաջիկայում բարձրանալու է։

Ի դեպ երեկ Հայաստան է ժամանել նաև ԱՄՆ պետքարտուղարության պատժամիջոցների համակարգման գրասենյակի ղեկավար Ջեյմս Օ՛Բրայենն, ինչպես նաև պաշտոնյաներ Մեծ Բրիտանիայից և Եվրամիությունից։ Օ՛Բրայենն արդեն հանդիպել է Նիկոլ Փաշինանի հետ, քննարկել տարածաշրջանում և միջազգային ասպարեզում տեղի ունեցած գործընթացներն, ինչպես նաև երկուստեք հետաքրքրություն ներկայացնող տարբեր հարցեր։

Հանդիպումը բավական երկար է տևել, և իրականում քննարկել են ոչ միայն տարածաշրջանին վերաբերող հարցերն, այլ հատկապես Ռուսաստանի դեմ պատժամիջոցները խորացնելու հարցերը։ Ամերիկյան կողմը Նիկոլ Փաշինյանին խոստացել է Ռուսաստանի դեմ պատժամիջոցները խստացնելու և ռազմական բնույթի ապրանքներ Ռուսաստան չարտահանելու դեպքում լուրջ տնտեսական և քաղաքական արտոնություններ տրամադրել։ Նաև զգուշացրել է, որ հակառակն անելու դեպքում Հայաստանն ամբողջությամբ խնդիրների է բախվելու։ 

Էմմա Սիմոնյան