Եղել են զինատեսակներ, որոնց կիրառելու իրավունքը լիարժեք եւ ամբողջությամբ Հայաստանին չի պատկանել. Փաշինյան

Շատ դրվագներ կան պատերազմի հետ կապված, որոնք ինձ հանգեցրել են մտքի ու վարկածների, որ այն, ինչ տեղի է ունեցել առաջնագծում, դրա նպատակը դրա նպատակը իշխանափոխություն կազմակերպելն է: Այս մասին, այսօր՝ հունիսի 27-ին, 44-օրյա պատերազմի հանգամանքներն ուսումնասիրող ԱԺ քննիչ հանձնաժողովի նիստում հայտարարեց ՀՀ վարչապետ Նիկոլ Փաշինյանը:

«Շատ երկար ժամանակ ես ինձ թույլ չեմ տվել նման բան մտքովս անցկացնել, բայց հետո սկսել եմ մտածել դրա մասին: Այդ վարկածը ուժեղացել է Սոթք-Խոզնավար հատվածում իրադարձություններով: Ասենք պարզվել է, որ X մարդը արել է այս գործողություն, բայց ինչու է արել, դա պարզված չէ: Սա շատ կարեւոր նյուանս է»,-ասաց նա:

Հարցին՝ պատերազմում եղե՞լ է դեպք, որ ասենք, իր կողմից լինի հրաման որեւէ զենք, մասնավորապես, այս կամ այն հրթիռը չօգտագործելու հետ կապված, Փաշինյանը նախ նշեց, որ ճիշտ կլինի այս հարցին անդրադառնալ փակ նիստում, ապա հավելեց. «Եղել են զինատեսակներ, որոնց հետ կապված իրավունքը լիարժեք եւ ամբողջությամբ Հայաստանին չի պատկանել»: