Վարչախումբը լայն թափով պատրաստվում է Երևանի ավագանու առաջիկա ընտրություններին

Գործող վարչախումբը լայն թափով պատրաստվում է Երևանի ավագանու առաջիկա ընտրություններին։ Ինչպես և կանխատեսել էինք այդ ընտրություններում մասնակցելու են բազմաթիվ կուսակցություններ և դաշինքներ, որոնք փորձելու են ներկայանալ որպես ընդդիմադիր և քվեներ տանել իրական ընդդիմադիր ուժերից, իսկ ավագանիում հայտնվելու դեպքում այդ ուժերը համագործակցելու են փաշինյանական իշխանությունների հետ։

Երեկ հայտնի է դարձել, որ ավագանու ընտրություններում «Հանրապետություն» կուսակցության քաղաքապետի թեկնածուն, արդարադատության նախկին նախարար, կուսակցության նախկին խորհրդի անդամ Արտակ Զեյնալյանն է։ Թեև տևական ժամանակ լուրեր էին շրջանառվում, որ Զեյնալյանը չի ցանկանում առաջադրվել և մասնակցել ընտրություններին, ըստ ամենայնի Արամ Սարգսյանին հաջողվել է նրան համոզել մասնակցել։ Զեյնալյանն այդ կուսակցության միակ թեկնածուն է, որը հանրության ընկալման մեջ որոշակի դրական ընկալում ունի։

Մասնակցելու են նաև «Լուսավոր Հայաստանը»՝ Դավիթ Խաժակյանի գլխավորությամբ, ինչպես նաև «Եվրոպական կուսակցության» և «Հնչակյանների» ներկայացրած թեկնածուն՝ սոցիոլոգ Կարեն Սարգսյանը, որը ֆեյսբուքում հայտնի է ավելի շատ որպես Փաշինյանի օգտին հայտարարություններ անող և ընդդիմախոսներին հայհոյող անձնավորություն։

Թե՛ «Քաղաքացիական պայմանագրի», թե՛ այս և մյուս հնարավոր թեկնածուների մեծ մասի առանցքային խնդիրն է ձայներ տանել ընդդիմադիր քաղաքական ուժերից և առաջին հերթին «Ապրելու երկիր» կուսակցությունից, որն էլ հիմնական մրցակցությունն է ապահովելու գործող իշխանությունների համար։

Առայժմ «Հայաստան» և «Պատիվ ունեմ» խմբակցությունները որևէ թեկնածուի մասին չեն հայտարարել։ ՔՊ մեր աղբյուրի փոխանցմամբ՝ իշխանությունը շահագրգռված է հնարավորինս լայն թվով կուսակցությունների մասնակցությունն ընտրություններին, այդ պարագայում նախ հնարավորություն կա ավելի շատ պղտորել քաղաքական դաշտը, փոշիացնել ընդդիմության իրական ձայները և վերջնական արդյունքում վարչական ռեսուրսի, կրիմինալի ու ընտրակեղծիքների միջոցով խլել իշխանությունն Երևանում։ Մայրաքաղաքում իշխանությունը կորցնելու դեպքում, ողջ հանրապետությունում իշխանափոխությունն առավել քան հավանական է թվում։

Նաիրի Աբգարյան