Տվերը սոցիալական ցանցերի միջոցով զարգացնում է հարաբերությունները քույր քաղաք Գյումրու հետ
ՎԵՐԼՈՒԾՈՒԹՅՈՒՆՆԵՐ
Tvernews.ru-ն գրում է, որ քույր քաղաքները՝ Տվերը և Գյումրին (Հայաստան) շարունակում են ակտիվորեն աշխատել առցանց։ Ներկայումս երկու քաղաքների ուսուցիչների թիմերի փոխգործակցությունն է շարունակվում։ Գործընկերային հարաբերությունների հաջորդ քայլը «Վկոնտակտե» սոցիալական ցանցում «Ինչպե՞ս ես դու» միջազգային նախագծի ստեղծումն է, որը միավորում է երկու քաղաքների դպրոցականներին։
«Ինչպե՞ս ես» միջազգային մշակութային և կրթական նախագիծը սկսվել է 2019 թվականին: Դրա նպատակն է ստեղծել միջմշակութային կրթական և ժամանցի միջավայր քույր քաղաքների դպրոցականների համար։ Ծրագրի մասնակից կարող են դառնալ դպրոցի աշակերտները, ուսուցիչները և բոլոր հետաքրքրված անձինք։
«Ինչպե՞ս ես» համատեղ նախագծի շրջանակներում ամեն ամիս հեռակոնֆերանսներ են անցկացվում Ռուսաստանի և Հայաստանի տասը դպրոցների միջև։ Կրթական կազմակերպությունների համագործակցության ծրագիրը ներառում է հետևյալ ուղղությունները՝ «Իմ քաղաքը», «Խոսակցագիրք ընկերոջ համար», «Գործընկեր դպրոցներ», «Աշխարհին պատմիր քո հայրենիքի մասին», ինչպես նաև լինում են փառատոներ, բնապահպանական և կամավորական միջոցառումներ։ #Memory blurs the borders առցանց հեշթեգով Հաղթանակի օրվան նվիրված միջոցառումներ են անցկացվել երկու քաղաքներում։
Քաղաքապետարանի տեղեկատվության և վերլուծության վարչությունից հայտնում են, որ սոցիալական ցանցում համատեղ խմբի ստեղծումը Տվերի և Գյումրիի դպրոցականներին թույլ կտա ավելին իմանալ «Ինչպե՞ս ես» քաղաքների միջազգային կրթական նախագծի գործունեության մասին։
Նյութը հրապարակման պատրաստեց Կամո Խաչիկյանը
