Վրաստանն ու Ադրբեջանը քննարկել են երկու երկրների միջեւ պետական ​​սահմանի սահմանազատման եւ սահմանագծման հարցերը

Երկուշաբթի Վրաստանի փոխարտգործնախարար Լաշա Դարսալիայի եւ նրա ադրբեջանցի գործընկեր Խալաֆ Խալաֆովի հանդիպման ժամանակ քննարկվել են Վրաստանի եւ Ադրբեջանի միջեւ համագործակցությունը եւ Հարավային Կովկասի տարածաշրջանում իրադարձությունները, հայտնում է Agenda.ge-ն։

Երկու պետությունների միջեւ քաղաքական խորհրդակցությունների շրջանակում անցկացված հանդիպման ընթացքում քննարկվել է երկու երկրների միջեւ առկա «սերտ» համագործակցությունը, որն, ըստ կողմերի, «հաջողությամբ զարգանում է ինչպես երկկողմ, այնպես էլ բազմակողմ ձեւաչափերում», - նշվում է Վրաստանի ԱԳՆ-ի հաղորդագրության մեջ։

Պաշտոնական անձինք պատրաստակամություն են հայտնել «հետագայում» խորացնել երկկողմ համագործակցությունը տնտեսության, առեւտրի, մշակույթի եւ այլ ոլորտներում։

Զրույցը նվիրված է եղել նաեւ  տարածաշրջանում տիրող իրավիճակին, մարտահրավերներին եւ խաղաղ լուծումներին։

Կողմերը նշել են խաղաղության եւ կայունության կարեւորությունը, ինչպես նաեւ Վրաստանի եւ Ադրբեջանի հատուկ ներդրումն ու համագործակցությունը տարածաշրջանի կայուն զարգացման գործում։

Հանդիպմանը քննարկվել են նաեւ երկու երկրների միջեւ պետական ​​սահմանի սահմանազատման եւ սահմանագծման հարցերը, ինչպես նաեւ այս հարցով պետական ​​հանձնաժողովների հերթական նիստի անցկացման հնարավորությունը։