Ինչու՞ Աշոտյանը. քրեական գործերն՝ ընդդիմախոսներին լռեցնելու առիթ

Ընդդիմախոսների դեմ հարուցված քրեական գործերը Հայաստանի գործող վարչախումբն օգտագործում է բացառապես նրանց քաղաքական բռնաճնշումների ենթարկելու, լռեցնելու համար, այլ ոչ թե օրենքի գերակայությունն ապահովելու կամ էլ տարբեր հարցերում մեղավորներին պատժելու։

Ըստ էության, 2018 թվականի այսպես կոչված հեղափոխությունից հետո փաշինյանական վարչախումբը բազմաթիվ քրեական գործեր է հարուցել իր ընդդիմախոսների դեմ։

Գալով իշխանության և խոստանալով պատժել «թալանչիներին»՝  Փաշինյանն այդպես էլ որևէ հարցում չի կարողացել հասնել արդարադատության, ընդհակառակը, նախկինների որևէ ներկայացուցիչ մինչ օրս դատապարտված և ազատազրկված չէ։ «Նախկիններից» շատերը այսօր լուռ են, որոշներն էլ նույնիսկ աշխատում են գործող իշխանության համար, տարբեր ծառայություններ մատուցում, իսկ նրանք, ովքեր սկզբունքային դիրքորոշում են դրսևորել և ռեժիմի մոլի քննադատներն են, պարբերաբար հայտնվում են փաշինյանական իշխանության թիրախում։

Ընդ որում այս հետապնդումները բավականին ուշագրավ կերպով են իրականացվում, ոչ թե միանգամից, կամ էլ պատահաբար, այլ ըստ հայեցողության, անհրաժեշտության պահին հանրության ուշադրությունը շեղելու նպատակով, ինչը վկայում է, որ գործ ունենք ոչ միայն քաղաքական հաշվեհարդարի, այլ նաև սովորական քաղաքական մանիպուլացիայի, հանրությանը մոլորեցնելու փորձերի հետ։

Արմեն Աշոտյանի հետ կատարվողը, քննչական կոմիտեի տարածած ձայնագրությունը և տարբեր մասնագետ իարվանբանների կարծիքները վկայում են, որ այս անգամ ևս ոչ թե խնդիրն իրավունքն է, այլ զուտ շոու ապահովելն, ընդ որում, երկու ամիս կալանավորելով, փաշինյանական վարչախումբը փորձում է լռեցնել Աշոտյանին։

Շատերը փաստում են, որ այս ամենը իրականացվում է հատկապես այն դեպքերում, երբ գործող վարչախումբը փորձում է ինչ-որ հերթական դավադրություն իրականացնել Հանրապետության դեմ, ուստի և, գրեթե առանց բացառության, կարելի է փաստել, որ ցանկացած նման շոուի դեպքում երկրին ինչ-որ լուրջ ցնցում է սպասվում։

Նելլի Աբրահամյան