Նիկոլ Փաշինյանը պատրաստվում է Սփյուռքում նոր դավադրություն իրականացնել

Նիկոլ Փաշինյանը պատրաստվում է Սփյուռքում նոր դավադրություն իրականացնել։ Սփյուռքի գործերի գլխավոր հանձնակատար Զարեհ Սինանյանը շաբաթներ առաջ Ազգային ժողովում հայտարարել էր, թե առաջիկայում հայկական Սփյուռքի խոշոր կենտրոններում հանձնակատարներ կնշանակվեն։

Ավելին՝ Հանրային ծառայությունների մասին օրենքում դեռևս 2021 թվականի նոյեմբերին կատարվել է փոփոխություն, ըստ որի Սփյուռքում նշանակվելու են հանձնակատարներ։ Դա լինելու է հայեցողական պաշտոն, հանձնակատարները նշանակվելու են վարչապետի կողմից՝ Սփյուռքի կողմից գլխավոր հանձնակատարի առաջարկությամբ։ Աշխատանքներն արդեն երկու տարի ընթացքի մեջ են և միայն այժմ դրա վերաբերյալ որոշակի տեղեկություններ են հայտնի դառնում։ Սփյուռքի գործերի գլխավոր հանձնակատարի գրասենյակը ցուցակներն էր ճշտում, որպեսզի բոլոր նշանակումներն իրականացվեն միաժամանակ՝ անակնկալի բերելով թե՛ Սփյուռքում գործող և ներկայիս իշխանություններին ընդդիմադիր համայնքներին և թե՛ գործիչներին ու քաղաքական ուժերին։

Փաշինյանը իր 44-օրյա պատերազմից հետո բազմաթիվ անգամներ առնչվել է Սփյուռքի բուռն դժգոհության հետ, իսկ շատ դեպքերում նրան պարզապես շան օրի են հասցրել՝ հարցակոխ անելով տարբեր թեմաներով։ Բանը հասել էր այնտեղ, որ վերջերս Քիշնևում կայացած հանդիպմանը հայ համայնքի ղեկավարին ընդհանրապես չէին հրավիրել Փաշինյանի հետ հանդիպմանը, ավելին խաբել էին, թե հանդիպում տեղի չի ունենալու, իսկ իրականում Ուկրաինայում Հայաստանի դեսպան Վլադիմիր Կարապետյանը մի քանի ուկրաինահայ գործարարների էր բերել, որոնց ներկայացրել էին որպես Մոլդովայի հայ համայնքի ներկայացուցիչներ։

Այժմ Փաշինյանը փորձում է միջոցներ ձեռնարկել ընդհանրապես սփյուռքի հետ իր կապը բացառապես ցանկալի մարդկանց հետ իրականացնելու համար, իսկ դրա «ամենահարմար» տարբերակը հենց պետական պաշտոնյաների կամ տեղերում անձանց նշանակելն է, որոնք կախվածության մեջ կլինեն Փաշինյանից և չեն կատարի ավանդական կուսակցությունների պահանջները, ընդ որում նման նշանակումներ առաջին հերթին իրականացվելու են խոշոր երկրներում և հատկապես այն երկրներում, որոնց հետ Փաշինյանն ունի անձնական կապեր և հաճախ է լինում, այդ թվում եվրոպական մի շարք երկրներում՝ Նիդերլանդներում, Բելգիայում, Ֆրանսիայում, Իսպանիայում, Իտալիայում, Հունաստանում, նաև Լեհաստանում, ԱՄՆ-ում ու Ռուսատանում։

Հատկապես Ռուսաստանի պարագայում, բանն այն է, որ Փաշինյանը չի վստահում ո՛չ իր նշանակած դեսպան Վաղարշակ Հարությունյանին, ո՛չ էլ առավել ևս Ռուսաստանի հայերի միությանը։

Նարինե Մելիքյան