Սերխիո Ռամոսը հայտարարեց ՊՍԺ-ից հեռանալու մասին

Վաղը հատուկ օր է, վաղը ես հրաժեշտ կտամ կյանքիս մեկ այլ փուլին, հրաժեշտ կտամ ՊՍԺ-ին։ Այս մասին իր սոցցանցային էջերում գրել է Ֆրանսիայի չեմպիոն «Պարի Սեն Ժերմեն»-ի պաշտպան Սերխիո Ռամոսը։

«Չգիտեմ, թե քանի տեղում կարելի է զգալ ինչպես տանը, բայց, անկասկած, ՊՍԺ-ն, երկրպագուներն ու Փարիզը նրանցից մեկն էին ինձ համար։ Շնորհակալ եմ երկու յուրահատուկ տարիների համար, երբ ես կարողացա խաղալ յուրաքանչյուր մրցաշարում ու տալ իմ ամենը: Ես կկանգնեմ նոր մարտահրավերների առջև, կհագնեմ այլ գույներ, բայց առաջին ու վերջին անգամ»,- հավելել է իսպանացի վետերանը։

Ռամոսի հեռանալու մասին հայտնել է նաև ՊՍԺ-ն իր պաշտոնական կայքում՝ շնորհակալություն հայտնելով։

Ֆրանսիական ակումբը 3-րդն է 37-ամյա պաշտպանի կարիերայի ընթացքում։ Իր առաջին քայլերը Ռամոսը սկսել է իսպանական «Սևիլյա»-ում։

2005 թվականին տեղափոխվել է Մադրիդի «Ռեալ», որտեղ 4 անգամ դարձել է Չեմպիոնների լիգայի, 5 անգամ Լա Լիգայի, 2 անգամ Իսպանիայի գավաթի, 4 անգամ ակումբային աշխարհի առաջնության, 3 անգամ ՈւԵՖԱ-ի սուպեր գավաթի, 4 անգամ Իսպանիայի սուպեր գավաթի հաղթող։

Ռամոսը ՊՍԺ է տեղափոխվել 2021 թվականին։ Այս ընթացքում 2 անգամ դարձել է Ֆրանսիայի առաջնության, իսկ 1 անգամ սուպեր գավաթի հաղթող։ Իսպանացի պաշտպանի պայմանագիրը «փարիզցիների» հետ լրանում է այս տարվա հունիսի 30-ին։