Ժողովուրդը Կարեն Դեմիրճյանի պես առաջնորդների կարիքն ունի

Նախօրեին Հայաստանում նշում էին Ազգային Ժողովի նախկին նախագահ, հայ քաղաքական ու պետական գործիչ ՀԿԿ կենտկոմի առաջին քարտուղար Կարեն Դեմիրճյանի ծննդյան 91-ամյակը։ Դեմիրճյանի ընկերներն ու բարեկամները հավաքվել էին Կոմիտասի անվան պանթեոնում՝ իրենց հարգանքի տուրքը մատուցելու նրան, և օրվա կապակցությամբ մամուլի արձագանքը քաղաքական գործիչների և քաղաքական դեմքերի վերլուծությունները վկայում են, որ Հայաստանում այսօր հենց Կարեն Դեմիրճյանի նման նոր լիդերների մեծ պակաս կա, մարդիկ, որքան էլ ցավալի է այդ փաստն արձանագրել, անկախության տարիների առաջնորդների մեջ չեն տեսնում իրենց բոլոր ցավերին դարման անողին։

Գործող իշխանության՝ Նիկոլ Փաշինյանի օրոք, երբ 2018-ին հույսով լցված փոփոխություններ էին ակնկալում, իսկ 2 տարի անց էլ ողբում ցավալի պարտության համար, որևէ իրական, ռեալ առաջնորդի մասին խոսելն անհնար է, ուստի ողջ ժողովուրդը հենց Կարեն Դեմիրճյանի պես առաջնորդ է ուզում, ժողովրդի նոր հին հերոսը՝ շինարար, հայրենասեր, երկիրը չծախող մարդն է, որը հոգատար է իր ժողովրդի բոլոր խավերի հանդեպ, կոմպետենտ է և կարողանում է ժամանակին արձագանքել մարտահրավերներին։

Ուշագրավ էր նաև, որ Դեմիրճյանների ընտանիքը չափազանց սերտ հարաբերություների մեջ է «Ապրելու երկիր» կուսակցության հետ, հատկապես «Ապրելու երկիր» կուսակցության ներկայացուցիչների այս այցը պանթեոն, նրանց հանդիպումը Դեմիրճյանների ընտանիքի անդամների հետ, բավական ուշագրավ ենթադրություններ կարող են ծնել, որ Դեմիրճյանների ընտանիքն էլ նոր սերնդի քաղաքական գործիչների մեջ էլ տեսնում են կոմպետենտ և ընդունակ մարդկանց, որոնք կարող են վերցնել երկրի զարգացման էստաֆետը։ Փաստացի սա է ամենակարևորը և սա է մեր հանրության լրջագույն մտածմունքներից մեկը։

Ո՞վ ի վերջո պետք է առաջնորդի հանրությանը։

Լուսինե Մանուկյան