Ալեն Սիմոնյանի պաշտոնյային և տղամարդուն ոչ վայել պահվածքը նորություն չէ

10-ից ավելի լրագրողական ՀԿ-ներ հանդես են եկել հայտարարությամբ՝ պահանջելով ԱԺ նախագահ Ալեն Սիմոնյանի վարքագիծը, կապված քաղաքացու վրա թքելու հետ,  քննել ԱԺ էթիկայի հանձնաժողովում:

Հայտարարությունում ի թիվս այլնի ասվում է. «Խստորեն դատապարտելով ԱԺ ղեկավարի նման պահվածքը՝ պահանջում ենք Ազգային Ժողովի պատգամավորներից, և հատկապես քաղաքական մեծամասնությունից, ջանքեր գործադրել բացառելու հանրային պաշտոնյաների՝ իրավական պետության արժեքներին անհարիր, ցինիկ և անպատասխանատու վարքագիծը: Հորդորում ենք ՀՀ Ազգային ժողովի մեծամասնությանը՝ հրատապ ձևավորել էթիկայի հանձնաժողով և քննության առնել տեղի ունեցածը, ինչպես նաև դիտարկել ԱԺ նախագահի պատասխանատվության ենթարկելու հարցը։

Տեղի ունեցածը նաև պետք է քննության առարկա դառնա իրավապահ մարմինների կողմից, մասնավորապես, քրեական վարույթի շրջանակներում՝ խուլիգանության հանցակազմի մասով: ․․․ՀՀ Ազգային ժողովի յուրաքանչյուր պատգամավոր իր ամենօրյա վարքով, պահվածքով, խոսքով պետք է ապացուցի, որ արժանի է լինելու իր ժողովրդի ընտրյալը»:

Ալեն Սիմոնյանի պաշտոնյային և տղամարդուն ոչ վայել պահվածքը նորություն չէ։ ԱԺ նախագահը լրագրողների հետ ճեպազրույցների ժամանակ մշտապես աչքի է ընկել ագրեսիվ պահվածքով և անհարգալից արտահայտություններ անելով, մասնավորապես լրագրողներին ծաղրելով և վիրավորելով ոչ միայն լրագրողին, այլ այն լրատվամիջոցին, որը ներկայացնում է լրագրողը։ Սիմոնյանը երեկ էլ լրագրողի հետ զրույցում մասնավորապես ասաց․ «Որակումները կգնաս խմբագրիդ կտաս»։

Վիրավորեց լրագրողի արժանապատվությունը, ինչպես նաև «դու»-ով խոսեց լրագրողի հետ։ Նման միջադեպերի օրինակները շատ են։ Օրինակ՝ Ալեն Սիմոնյանի կարգադրությամբ ԱԺ-ից հանվեցին միջանցքների նստարանները, քանի որ, ըստ Սիմոնյանի, իրենց անցնելուց լրագրողները և օպերատորները ոտքի չեն կանգում և հարգանքով չեն վերաբերում իրենց։ Տարօրինակ է, որ հարգանք է պահանջում մի մարդ, ով ինքը դիմացինին հարգանքով վերաբերելու դաստիարակությամբ աչքի չի ընկնում։

Էականն այն է, որ այս պահվածքի չդատապարտելը բերել է նրան, որ այսօր լրագրողները սեփական նախաձեռնությամբ դատապարտում են Սիմոնյանի՝ քաղաքացու նկատմամբ վերաբերմունքը։ Էլի սեփական անձը մի կողմ դնելով, տեսնելով, որ իրավական և քաղաքական գնահատական չի տրվում ԱԺ նախագահի պահվածքին, նախաձեռնող են դառնում նման հաջորդ միջաեպերը կանխելու գործին։  

Համացանցում բոլորը հիշեցնում են Սիմոնյանի ընտանիքի անդամի պահվածքը ընդդիմության ցույցերին և ակնարկում, որ մարդկանց վրա թքելը դաստիարակության արդյունք է։ 

Հետաքրքրական է, թե ինչպես են այս ամենը հաշվի առնելով միջազգային հանրության ներկայացուցչությունները, մարդու իրավունքների պաշտպանությամբ զբաղվող կազմակերությունները, տարբեր երկրների դեսպանությունները ընդունելու կամ հյուրընկալվելու նման վարքագիծ դրսևորած ԱԺ նախագահի մոտ։

Աննա Ավետիսյան