Գոլ խփելուց հետո երկրպագուների բանակն ավելանում է, իսկ ծափերը չեն ուշանում

«Երեկվա «քստմնելի սադրանքով» պայմանավորված` դրսից տարբեր միջոցներով հրահանգավորվողները փորձում են հասարակությանը կերակրել իրենց սին և լկտի ստերով. միջադեպն ընդամենը արդյունքն է նրա, որ քաղաքական մեծամասնությունը ոչ միայն չդատապարտեց Ազգային ժողովում իր ներկայացուցիչների նախկինում թույլ տված հանցավոր գործողությունները, այլև օգտվելով իրավապահ համակարգում իրենց լծակներից, ըստ էության, արգելեց դրանց քրեաիրավական գնահատումը հետևանքներով հանդերձ: Ավելին, նման երկակի ստանդարտների կիրառումից զատ, քաղաքական ամենաբարձր մակարդակով այս իշխանությունը խրախուսեց իր անդամների կողմից խուլիգանական պահվածքը, Ազգային ժողովի մեծամասնության կողմից իշխանազանցման և օրենքների խախտման, պատգամավորների միջև միջանձնային հարաբերությունների և կարգավիճակով պայմանավորված էթիկայի խախտման դեպքերը, ինչի արդյունքն էլ տեսնում ենք բոլորս:

Ոգևորվելով իրենց անպատժելիությունից և տիրանալով իրավապահ համակարգին` քպ-ականները սկսել են հարցազրույցների միջոցով նախաքննական մարմիններին ուղղորդել և իրենց կեղծ վարկածները դարձնել հիմնական, ինչը, միանշանակ, չի ստացվելու… »։

Այս մասին ֆեյսբուքյան իր էջում գրել  է Պաշտպանության նախկին նախարար, ԱԺ «Հայաստան» խմբակցության ղեկավար, գեներալ  Սեյրան Օհանյանը՝ անդրադառնալով Մհեր Սահակյանի և Վլադիմիր Վարդանյանի միջև տեղի ունեցած միջադեպին:

Իսկապես, պարո՛ն Օհանյան, և ո՞վ պետք է պատժեր Ձեր նշած ՔՊ-ականներին: Հենց նրանց անպատժելիության մթնոլորտը վերացնելու, արատախիլ անելու համար էլ հասարակությունը ձեր խմբակցությանը և մյուս ընդդիմադիրներին գործուղել է Ազգային ժողով, իսկ դուք թույլ եք տվել, որ այդ անպատժելիության մթնոլորտն արմատներ գցի հենց ԱԺ-ում: Միշտ էլ բոլոր հասարակություններում էլ, երբ իրավական համակարգն իր տեղում չէ, հասարակությունն է որոշում և իր օրենքներով պատժում օրինախախտներին: Դուք, պարո՛ն Օհանյան, բանակում չգրված օրենքներով պատժելու կանոնների քաջատեղյակ եք, և, հավանաբար, համոզվել եք դրա արդյունավետության մեջ: Շիշը նետելը բավարար չէր: Իհարկե, հասկանալի է, որ նյադերն են տեղի տվել, որ երկար ժամանակ իրավական լուծումի սպասում է դրդել դրան, եթե հաշվի առենք նաև Ձեզ անձնական չափազանց զուսպ տեսակը, դա պահի թելադրանք էր և ոչ թե մտածված պատիժ: Զինվորականներն այդպես չեն պատժում:

Հասարակությունը ձեզ գործուղել է ԱԺ, որ նաև պատժի տեսակները որոշեք ինքներդ, իսկ հիմա, պարո՛ն գեներալ, Դուք սպասում եք, որ էլի հասարակությունն ինչ-որ ձևով արձագանքի: Ո՛չ, այս դեպքում գնդակը ձեր դաշտում է, իսկ գոլ խփելու ձևին դուք հասարակությունից ավելի քաջատեղյակ եք: Հավատացեք, որ գոլ խփելուց հետո երկրպագուների բանակն ավելանում է, իսկ ծափերը չեն ուշանում:

Աննա Ավետիսյան