Տարօրինակ ջերմացում՝ հայ-ռուսական հարաբերություններում

Հռոմի ստատուտի շուրջ հայ-ռուսական հարաբերությունների սրումը հասկանալի էր, սակայն տարօրինակ կերպով երեկ ռուսական կողմի մի շարք հայտարարություններ աչքի են ընկել բավականին մեղմ ձևակերպումներով։

ՌԴ արտգործնախարարության խոսնակ Մարիա Զախարովան իր ամեշաբաթյա ճեպազրույցում պատասխանել է լրագրողների հարցերին և հայտարարել, թե Մոսկվան Երևանի հետ բարձր մակարդակի շփումներում քննարկում է միջազգային քրեական դատարանի կանոնագրքի հնարավոր վավերացման հարցը։ «Անհրաժեշտ չեմ համարում բացահայտել այդ շփումների մանրամասները, ենթադրում ենք, որ այս հարցը կկարգավորվի դաշնակցային ու փոխընդունելի ձևով»։

Հիշեցնենք՝ անցած շաբաթվա վերջին սահմանադրական դատարանը հայտարարեց, թե միջազգային քրեական դատարանի Հռոմի կանոնադրությունը համապատասխանում է Հայաստանի մայր օրենքին։ Եթե այն վավերացվի նաև խորհրդարանում, Հայաստանի իրավապահները պարտավորված կլինեն ձերբակալել Ռուսատանի նախագահին, եթե վերջինս Հայաստան այցելի, այլ հարց, որ Հայաստանի որևէ իշխանություն չունի նման հանդգնություն ձերբակալելու Ռուսաստանի նախագահին, սակայն ՍԴ այս որոշումը բավականին լուրջ նստվածք է տվել և ռուսական կողմից զայրալից հայտարարություններ են հնչում։

Այժմ Մարիա Զախարովայի այս մեղմ տոնը վկայում է, որ ռուսական կողմը ինչ-ինչ պայմանավորվածությունների մեջ է հայկական կողմի հետ և բանակցությունները շարունակում է։ Հայաստանի նկատմամբ մտրակի և բլիթի տրամաբանության մի հայտարարություն էլ երեկ Ռուսաստանի դաշնային խորհրդի փոխխոսնակ Կոնստանտին Կոսաչովն է արել։

Ափսոսանք է հայտնել, որ Ռուսաստանի որոշ դաշնակիցներ, այդ թվում Հայաստանը, մասնակցել են Սպիտակ տան նախաձեռնած «Հանուն ժողովրդավարության» գագաթնաժողովին։ «Եթե չեմ սխալվում դրան մասնակցում են մոտ 120 երկրներ, այդ թվում, ցավոք, որոշ մեր դաշնակիցներ Հայաստանի նման։ Ես այդ մասին ափսոսանքով եմ ասում»,- նշել է Կոսաչովը։

Միևնույն ժամանակ նա հայտարարել է, թե ի պատիվ հայերի նրանք վերապահումով են միացել նիստի ավարտին ընդունված հռչակագրին, որը պահանջում է Ռուսաստանից անհապաղ ամբողջությամբ և անվերապահորեն դուրս բերել բոլոր ռազմական ուժերն Ուկրաինայից և դադարեղցնել ռազմական գործողությունները։

Ըստ Կոսաչովի՝ այդ կետից ձեռնպահ են մնացել 3 երկրներ՝ Հայաստանը, Մեքսիկան և Հնդկաստանը։ Թեև Հայաստանի պաշտոնական դիրքորոշման մեջ նշված է, որ Հայաստանը վերապահումով է միանում հռչակագրին՝ կապված Ադրբեջանին չդատապարտելու հետ, սակայն Կոսաչովի այս կիսաքննադատական, կիսագովաբանական հայտարարությունը ևս վկայում է Երևանի և Մոսկվայի սառած հարաբերություններում որոշակի ջերմացման մասին։

Ալիսա Մուրադյան