Մոսկվան ակնկալում է, որ ՀԱՊԿ մյուս անդամների հետ Երևանի փոխգործակցության բնույթի վերաբերյալ «վնասակար քննարկումները» կդադարեն․ Գալուզին

Մոսկվան ակնկալում է, որ ՀԱՊԿ մյուս անդամների հետ Երևանի փոխգործակցության բնույթի վերաբերյալ «վնասակար քննարկումները» կդադարեն, և դրա հետ կապված ծագող հարցերը կառուցողական լուծում կստանան։ Այս մասին այսօր հայտարարել է ՌԴ փոխարտգործնախարար Միխայիլ Գալուզինը։

Անդրադառնալով ՀՀ վարչապետ Նիկոլ Փաշինյանի հայտարարությանը, որ Հայաստանը չէ, որ դուրս է գալիս ՀԱՊԿ-ից, այլ, հնարավոր է, ՀԱՊԿ-ն է հեռանում Հայաստանից, Գալուզինը նշեց. «Ակնկալում ենք, որ «ով որտեղից է դուրս գալիս» թեմայով վնասակար քննարկումները կդադարեն, և ՀԱՊԿ շրջանակում Երևանի հետ փոխգործակցության բոլոր հարցերը, ներառյալ Հայաստանի տարածքում կազմակերպության դիտորդական առաքելության տեղակայումը, կլուծվեն կառուցողական և փոխշահավետ ձևով»։

Ռուսաստանի փոխարտգործնախարարը հաստատել է իր պատրաստակամությունը, Հայաստանի անվտանգության ապահովման շահերից ելնելով, իրականացնել հայ-ադրբեջանական սահմանին ՀԱՊԿ առաքելություն տեղակայման ծրագրերը, ինչպես նաև աջակցության այլ միջոցառումներ, որոնք նախատեսված են ՀԱՊԿ Հավաքական անվտանգության խորհրդի՝ հանրապետությանն օգնություն ցուցաբերելու մասին համապատասխան որոշման նախագծով։