Հայաստանի իշխանությունների որոշումը ծայրահեղ քաղաքական կուրություն է և հղի է անկանխատեսելի հետևանքներով

«Հռոմի ստատուտը ճանաչելու Երևանի որոշումը բեկումնային կարող է լինել հայ-ռուսական հարաբերություններում»։

Այս արձանագրումն արել է Ռուսաստանի Պետդումայի պատգամավոր, Հայաստան մուտքի հնարավորությունից զրկված Կոնստանտին Զատուլինը՝ նշելով, որ Հայաստանի իշխանությունները նման քայլի են դիմել ԱՄՆ-ին և Եվրամիությանը իրենց արևմտամետ դիրքորոշումն ապացուցելու համար։

«Հայաստանի իշխանությունները շարժում են Արևմուտքի հետ մերձեցման և Ռուսաստանից հեռանալու ճանապարհով, թեև Ղարաբաղի հայերի անվտանգության հարցերն ամեն ինչով կախված են Մոսկվայից։ Փաստն այն է, որ Հայաստանի գործող իշխանությունը հանձնել է այդ տարածքը, ինքը վարչապետը Ղարաբաղի հայերին յուրային չի համարում»,- հայտարարել է Զատուլինը։

Կանխատեսել էինք, որ Հռոմի ստատուտի ճանաչման որոշումը լուրջ խնդիրներ է հարուցելու Ռուսաստանում, և ռուսական մեդիան ու հանրային դեմքերը, քաղաքական գործիչները իսկական հարձակում են սկսելու Հայաստանի Հանրապետության դեմ։

Այն, որ Սահմանադրական դատարանի որոշումը լուրջ խնդիրներ է հարուցելու Հայաստանի համար, արձանագրել է նաև ՀՀԿ-ն՝ նշելով, թե իշխանությունների այս որոշումը ներկա աշխարհաքաղաքական իրավիճակում ծայրահեղ քաղաքական կուրություն է և հղի է անկանխատեսելի հետևանքներով։

«Գաղտնիք չէ, որ միջազգային քրեական դատարանը չափազանց քաղաքականացված մարմին է և բոլորովին էլ պատահական չէ, որ նույնիսկ ՄԱԿ անվտանգության խորհրդի մշտական անդամներ հանդիսացող այնպիսի հզոր տերություններ, ինչպիսին են ԱՄՆ-ն, Չինաստանը և Ռուսաստանը, չեն ստորագրել կամ վավերացրել այդ կանոնադրությունը և նման մտադրություն չունեն նաև ապագայում»,-նշել են նախկին իշխանությունների ներկայացուցիչները՝ փաստելով, որ ակնհայտ քաղաքական կարճատեսությունը կարծել է, որ այդ դատարանին միանալը կարող է երբևէ օգտագործվել Հայաստանի շահերի պաշտպանության համար։

Ըստ էության, թե՛ հայաստանյան ընդդիմությունը և թե՛ ռուսական շրջանակները ամեն կերպ փորձում են բացատրել, որ առնվազն այս պահին նման որոշում կայացնելը հղի է լուրջ հետևանքներով։

Ռուսաստանի ԱԳՆ-ի պաշտոնական այլ մարմինների նախազգուշացումները Նիկոլ Փաշինյանն ու իր թիմը բանի տեղ չեն դրել և ամեն կերպ շարունակում են նույն ուղղությամբ, ինչը ծանր հետևանքներ կարող է ունենալ Հայաստանի Հանրապետության համար։ Արդյոք նրանք հավարկել են այդ հետևանքները, բնականաբար՝ ոչ, ուստի և առաջիկայում պետք է պատրաստ լինել նոր և ծանր հետևանքների։ Մեր «ռազմավարական դաշնակիցը» նման քայլերը անհետևանք չի թողնելու։

Սարգիս Մարգարյան