«Գոյ» թատրոնի շուրջ աղմուկն օգտագոծում են փոխնախարարից ազատվելու համար

«Գոյ» թատրոնի շուրջ ստեղծված աղմուկը սպառնում է դառնալ այս իշխանությունների համար առանցքային փորձաքարերից մեկը։

Տարօրինակ զուգադիպությամբ, սակայն, թատրոնի շուրջ ստեղծված աղմուկը բավականին լավ լուսաբանվում է ոչ միայն ընդդիմադիր լրատվամիջոցներով, այլև՝ իշխանական, ինչը որոշակի զարմանք է հարուցում հանրության մեջ։ Թերևս այս հանգամանքը ունի իր լրջագույն բացատրությունը։

Նշենք, որ թատրոնը թիրախավորվել է գործող իշխանությունների կողմից բացառապես քաղաքական նկատառումներով։ «Գոյ» թատրոնի գլխավոր ռեժիսոր Արթուր Սահակյանը մոլի ընդդիմադիր է, Նիկոլ Փաշինյանին ու նրա թիմին ատում է նաև թատրոնի թատերախումբը։ Դիմադրության շարժման ժամանակ էլ թե՛ ռեժիսորը և թե՛ թատերախումբը չէին թաքցնում իրենց քաղաքական նախընտրությունները և բավական ակտիվորեն մասնակցում էին ընդդիմադիր ուժերի գործողություններին։

Իշխանության թիրախում, բացի «Գոյ» թատրոնից նաև մշակույթի գծով փոխնախարար Արա Խզմալյանն է։ Կառավարությունում ցանկանում են ազատվել վերջինիս ներկայությունից, իսկ թատրոնի շուրջ ստեղծված աղմուկը բավականին հարմար պատրվակ է այդ մտահաղացումը իրականացնելու համար, հատկապես իր տեղակալից ազատվելուն դեմ չէ ԿԳՄՍ գործող նախարար Ժաննա Անդրեասյանը։

Խզմալյանը մենաշնորհ ունի մշակութային գրանտներ տալու և նրա գործողությունների վերաբերյալ բավական կասկածներ կան։

Մեր աղբյուրների փոխանցմամբ՝ մշակութային բոլոր գրանտների ճակատագիրն է որոշում Արա Խզմալյանը, իր հետ կապված տարբեր կառույցների միջոցով։ Նույնիսկ եթե նախարարությունը տենդերներ է հայտարարում մշակութային նախագծերի և ծրագրերի իրականացման համար, փողերը, միևնույնն է, գնում են այն ուղղությամբ, ուր ուղորդում է Արա Խզմալյանը։ Նախկին նախարար Վահրամ Դումանյանի օրոք, Խզմալյանը բավականին հարմարավետ էր զգում իրեն և կարողանում էր մատի վրա խաղացնել ԿԳՄՍ նախարարին՝ իրականացնելով իր բոլոր ծրագրերը։ Ժաննա Անդրեասյանը, թերևս, Դումանյան չէ և չի ցանկանում իր նախարարությունում ունենալ Խզմալյանի պես պատրաստված և կոռուպցիոն սխեմաներին բավականին լավ տիրապետող պաշտոնիայի։

Ավելին, գործող նախարարը ցանկանում է իր ձեռքը վերցնել նախարարության ողջ ազդեցությունը, ուստի և թատրոնի շուրջ ստեղծված սկանդալը, մշակությային տարբեր ոլորտներում Արա Խզմալյանի նկատմամբ դժգոհությունները, և իրավապահների հետաքրքրվածությունը ձեռք է տալիս իշխանական տարբեր կլանների, ուստի և զարմանալի չէ թատրոնի շուրջ ստեղծված իրավիճակի բավական ակտիվ լուսաբանումը։ Սա հնարավորություն է իշխանական օղակների համար՝ փոխնախարարից ազատվելու ։

Անի Սիմոնյան