Արցախի նախագահը վտանգավոր զարգացումների մասին է խոսում. Ինչի՞ն են պատրաստում ժողովրդին

Արցախի նախագահ Արայիկ Հարությունյանը երեկ անվտանգության խորհրդի ընդլայնված նիստ է գումարել Ազգային ժողովի քաղաքական ուժերի և շրջանային վարչակազմերի ղեկավարների մասնակցությամբ և չափազանց ուշագրավ ու վտանգավոր մի քանի հայտարարություններ արել։

Հիշեցնելով, մարտի 1-ին անվտանգության խորհրդի քարտուղար Սամվել Շարամանյանի գլխավորությամբ արցախյան պատվիրակության հանդիպումը ադրբեջանական կողմի հետ, Հարությունյանը նշել է, թե այդ հանդիպումների օրակարգում 4 հարց է եղել՝ Լաչինի միջանցքի ապաշրջափակում, Հայաստանից Արցախ էլեկտրամատակարարման վերականգնում, բնական գազի անխափան մատակարարում և Կաշենի հանքավայրի վերաշահագործում։ Խոստովանելով, որ Ադրբեջանի ներկայացուցիչը փորձել է քննարկել քաղաքական հարցեր, սակայն արցախյան պատվիրակությունը կանխել է, Արայիկ Հարությունյանը նշել է, թե այդ հանդիպումից հետո ադրբեջանական կողմը իր խողովակներով փոխանցել է, թե՝ կամ ընդունում է ինտեգրացիոն քաղաքականությունը, կամ առկա խնդիրներին որևէ լուծում չի լինելու, հակառակը, լինելու են ավելի կոշտ և կտրուկ քայլեր։

Նեղսրտած նախագահը հայտարարել է, թե իրենք չեն ընդունել, չեն ընդունում և կրկին հայտարարում են, որ չեն հրաժարվելու անկախության իրավունքից և ինքնորոշման իրավունքից։ Միաժամանակ, Հարությունյանն արդեն հստակ «ահաբեկում է» սեփական ժողովրդին՝ նշելով, թե առաջիկայում ունենալու են տարբեր զարգացումներ, իրավիճակներ, որոնց պետք է դիմակայել, կամ ընտրում են շարունակել պայքարը, կամ էլ պետք է ընդունեն Ադրբեջանի կողմից ներկայացված առաջարկությունը, իսկ այդ դեպքում երկրում պետք է ձևավորել նոր իշխանություն։

Սա փաստացի վերջնագիր է սեփական ժողովրդին, որ կամ պատրաստում են նոր պատերազմի և նոր կորուստների, կամ էլ ստիպված են լինելու ընդունել Ադրբեջանի պահանջները։ Իհարկե, այսօրվա դրությամբ հայկական բանակը չունի այն անհրաժեշտ ռեսուրսները, որպեսզի կարողանա ևս մեկ պատերազմ մղել Ադրբեջանի հետ և կրկին ողբերգական կորուստներ ենք ունենալու, ուստի և այս հանգամանքը հաշվի առնելով, Արցախի ու Հայաստանի իշխանությունները սեփական ժողովրդին վախեցնելու նոր մարտավարություն են որդեգրել նորանոր զիջումներ Ադրբեջանին անելու համար։ 

Մինաս Ավագյան