Փաշինյանը ՔԿ-ին հանձնարարել է մեղավոր կարգել զինվորականներին

Գեղարքունիքի մարզի Ազատ գյուղում տեղի ունեցած ողբերգական դեպքից հետո մենք ընդգծել էինք, որ Փաշինյանը փորձելու է այսուհետ բանակում եղած բոլոր բոլոր խնդիրները բարդել զինվորականության և հրամանատարական կազմի վրա։

Ըստ էության մեր այդ կանխատեսումը վերաբերում էր ոչ միայն Գեղարքունիքի ողբերգությանը, որտեղ արդեն երեք սպաներ որպես մեղադրյալ են ընդգրկվել, իսկ նրանցից երկուսը կալանավորվել են, այլ նաև Փաշինյանը հստակ հանձնարարություն է տվել քննչական կոմիտեին՝ ամեն գնով 44-օրյա պատերազմի համար մեղավորներ կարգել զինվորական հրամանատարությանը։

Քննչական կոմիտեն երեկ կոլեգիայի նիստ է գումարել, որից հետո Արգիշտի Քյարամյանի ելույթի մի հատվածը տեսանյութով հրապարակվել է ֆեսբուքյան էջում։ Քյարամյանը հայտարարել է, թե կա հասարակական մեծ պահանջ, որ բացահայտվեն այն անձինք, ովքեր դարձել են պարտության պատճառ։ «Պետք է բացահայտվեն այն հանգամանքները, որոնց արդյունքում մենք պարտվել ենք»։ Հանրության զգալի մասը, իհարկե, գիտի պարտության թե՛ պատճառը , թե՛ հանգամանքները, թե՛ միակ մեղավորին ու պատասխանատուին։ Մինչդեռ Փաշինյանը սեփական մորթին փրկելու համար ամեն ինչ անում է զինվորականությանը կեղտոտ իրավական պրոցեսների մեջ ներքաշելու համար։ Ուստի և քննչական կոմիտեն նույնիսկ որոշակի ժամկետային սահմանափակումներ է ստացել գործերի քննության ընթացքում, և պետք է շուտափույթ ավարտեն բոլոր քննությունները և «մեղավորներին» իբր պատժեն։

Բնականաբար, որպես մեղավոր փորձելու են ներկայացնել միայն բարձրագույն զինվորականությանը։ Տարօրինակն այս ամեն ինչում հայկական գեներալիտետի լռությունն է և ստեղծված իրավիճակի հետ համակերպվելը։ Կամ նրանք իրենց իսկապսես մեղավոր են համարում Հայաստանի պարտության մեջ, կամ էլ Փաշինյանն այնպիսի կոմպրոմատներ ունի, որ կարողանում է ազդել այդ մարդկանց վրա և ստիպել նրանց լռել։

Սիմոն Վրացյան