Երևանի ավագանու ընտրությունները ըստ ամենայնի տեղի կունենա արտահերթ

Երևանի ավագանու ընտրությունները, որոնք, ըստ օրենքի, պետք է տեղի ունենա այս տարվա սեպտեմբեր ամսին, ըստ ամենայնի կկայանան արտահերթ։ Ինչպես InfoPort.am-ին հայտնեց «Քաղաքացիական պայմանագիր» կուսակցության իր աղբյուրը, նման նախնական որոշման է հանգել իշխող թիմը՝ հաշվի առնելով մի շարք մարտավարական և ռազմավարական հարցեր։

Ըստ աղբյուրի՝ ընտրությունները ամենայն հավանականությամբ, կկայանան սույն թվականի մայիս ամսին, եթե իհարկե ոչ մի ֆորս մաժոր չլինի, կամ հետագայում նորից որոշում չփոխվի։

Աղբյուրը մի ուշագրավ փաստ էլ ներկայացրեց․ «Gellup International»-ի սոցհարցման հրապարակումից հետո, երբ, ըստ Gellup-ի պարզվել է, որ ապագա քաղաքապետի հավանական թեկնածուների շարքում «ֆավորիտ» է համարվում ներկայիս քաղաքագլուխ Հրաչյա Սարգսյանը (18%), վերջինս առաջարկել է վերանայել կայացրած քաղաքական որոշումը և ապագա ընտրություններում որպես իշխող թիմի քաղաքապետի թեկնածու դիտարկել իր անձը։ Սակայն, ըստ աղբյուրի, նա մերժում է ստացել։