Կարծիք. Հայաստանը ոչ մի դեպքում չպետք է բացի «Զանգեզուրի միջանցքը»

Rossaprimavera.ru-ն գրում է, որ Ադրբեջանին պետք է, որ Հայաստանն ինքը բացի այսպես կոչված Զանգեզուրի միջանցքը, բայց դա չպետք է անել նույնիսկ Երևանի վրա հարձակման սպառնալիքի դեպքում, ֆեյսբուքյան իր էջում գրել է հայ վերլուծաբան Արգիշտի Կիվիրյանը: «Բանն այն չէ, որ Բաքուն չի կարող ուժով բացել այսպես կոչված Զանգեզուրի միջանցքը հաշվի առնելով իր հնարավորությունները և հայկական բանակի ներկայիս վիճակը, նա կարող է դրան հասնել նույնիսկ մի քանի ժամում, սակայն նրան պետք է, որ Հայաստանը իր ձեռքով բացի միջանցքը»,- գրել է Կիվիրյանը։

Նրա խոսքով, դա Ադրբեջանին թույլ կտա խուսափել համաշխարհային հանրության կողմից Բաքվին ագրեսոր հայտարարելուց։ Մյուս կողմից, Բաքուն վախենում է Իրանի անկանխատեսելի արձագանքից։ «Թեհրանի համար դա պետական ​​անվտանգության խնդիր է, և Իրանը կարող է և ի վիճակի է ուղղակի ներխուժմամբ պատասխանել ոչ միայն Սյունիքում, այլ նաև Նախիջևանում, Ջաբրայիլ-Զանգելանում և Մուղանում»,- նշել է վերլուծաբանը։ Կիվիրյանը կարծում է, որ Թեհրանը կարող է գոտի ստեղծել Իրանի և բուն Ադրբեջանի էթնիկ ադրբեջանցիներով բնակեցված իր շրջանների միջև, որը կա՛մ հավատարիմ կլինի Իրանին, կա՛մ «մեռած»:

Չցանկանալով ռիսկի դիմել Ադրբեջանի նախագահ Իլհամ Ալիևը հույս ունի, որ հայկական կողմն իր ձեռքով կբացի այդ միջանցքը, կարծում է վերլուծաբանը։ Թեև միջազգային հանրությունը, նրա կարծիքով, ինքն էլ է կողմ այդ միջանցքին։ Միաժամանակ, եթե հայերն իրենք բացեն «Զանգեզուրի միջանցքը», ապա Իրանի ցանկացած կտրուկ գործողություն չի դիտարկվի որպես ագրեսիվ Ադրբեջանին զսպելու ակտ, և Թեհրանն ինքը կհայտարարվի ագրեսոր, համոզված է Կիվիրյանը։ «Ինչ էլ որ լինի հայկական կողմը ոչ մի դեպքում, նույնիսկ եթե թշնամու զորքերը սկսեն սպառնալ Երևանին, իրավունք չունի ինքնակամ բացել այդ միջանցքը, քանի որ դրանով իսկ կզրկի Հայաստանի ապագա սերունդներից այս տարածքում պետականություն ունենալու ինչպես իրավունքից այնպես էլ հնարավորությունից»,- ընդգծել է հայ վերլուծաբանը։

Նյութը հրապարակման պատրաստեց Կամո Խաչիկյանը

www.1or.am