Ադրբեջանական սադրանքն ու Փաշինյանի լռությունը․ դավադրություն Հայաստանի դեմ

Ադրբեջանն արդեն երկրորդ օրն է՝ շարունակում է իր այլանդակ սադրանքը Լաչինի միջանցքում։ Ալիևյան վարչակազմը Շուշի-Ստեփանակերտ ճանապարհի հատվածում մի քանի հարյուր անձանց քաղաքացիական հագուստով զինվորականների, ինչպես նաև արտակարգ իրավիճակների նախարարության մեքենաներ է ուղարկել իր «բնապահպան» ցուցարարների փողոցում մնալը ապահովելու համար։

Ռուսական խաղաղապահ զորախումբն առայժմ որևէ կերպ չի միջամտում, ընդամենը մեկ-երկու ամրություններ են կառուցել իրենց ճանապարհի վրա և առայժմ մնացել են այդ հատվածում։ Երեկ երեկոյան էլ Ադրբեջանը ընդհանրապես ձմռան շեմին կտրել է Արցախի գազամատակարումը՝ հումանիտար աղետ առաջացնելով Արցախում։

Այս ֆոնին ամենատարօրինակ նորությունը, որ հնարավոր էր պատկերացնել ստացվեց Բրյուսելից։ Եվրամիության դիվանագիտության ղեկավար Ժոզեֆ Բորելը հայտարարել է, թե Բրյուսելը չի երկարաձգի Հայաստանում Եվրամիության դիտորդական առաքելության մանդատի ժամկետը, որն ավարտվում է հաջորդ շաբաթ։ Ըստ Բորելի՝ նման որոշում է կայացվել եվրամիության անդամ երկրների արտգործնախարարների Բրյուսելում տեղի ունեցած նիստին։ Թեև առաքելության աշխատանքը եվրամիության պաշտոնյան արդյունավետ է համարում, սակայն շեշտում է, որ և՛ Հայաստանի, և՛ Արբեջանի հետ պայմանավորվածությունների համաձայն առաքելությունն իր գործունեությունը դեկտեմբերի 19-ին պետք է ավարտի։

«Այդուհանդերձ Հայաստանիև Ադրբեջանի միջև երկխոսության միջնորդի մեր հեղինակությունը պահպանելու համար Հայաստան կուղարկվի խումբ, որպեսզի ծրագրի հնարավոր քաղաքացիական առաքելության ուղարկումը, եթե հաջորդ տարի նման համաձայնություն ձեռք բերվի»,- հայտարարել է Բորելը ակնհայտ նեղսրտվածությամբ, ինչը նշանակում է, որ Եվրամիությունը մտադիր է եղել շարունակել իր քաղաքացիական առաքելությունը, կամ էլ ցանկություն ունի շարունակելու այն, սակայն ստիպված է տեղավորվել նախապես համաձայնեցված ժամկետի շրջանակներում, քանի որ նման պահանջներ ստացվել է և՛ Ադրբեջանից, և՛ Հայաստանից։

Ի՞նչ է սա, եթե ոչ դավաճանություն փաշինյանական վարչախմբի կողմից։ Վարչապետի պաշտոնը զբաղեցնող անձը անվտանգության խորհրդի նիստ հրավիրելուց բացի որևէ կերպ չի անդրադարձել ադրբեջանական սադրանքին, փոխարենը պարտադրում է եվրոպացիներին հեռացնել իրենց առաքելությունը, թեև այդ առաքելությունը առանձնապես լուրջ ձեռքբերումներ չէր ունեցել, սակայն որոշակի զսպող գործառույթ է կատարում և այժմ առաքելության մանդատը չերկարացնելու Հայաստանի իշխանությունների նման քայլը վկայում է, որ Փաշինյանը ինչ-որ դավադիր պայմանավորվածությունների մեջ է Իլհամ Ալիևի հետ։

Աննա Նադոյան