Ադրբեջանը սրում է իրավիճակը, Փաշինյանը՝ պատրաստում զիջումների

Ադրբեջանը, տևական ժամանակ հրադադարի խախտման վերաբերյալ ապատեղեկատվություններ տարածելով, երեկ լրջորեն խախտել է ռեժիմը, Արցախի արևմտյան ուղղությամբ հրաձգային զինատեսակների և ականանետերի կիրառման հետևանքով վիրավորում են ստացել պաշտպանության բանակի երկու զինծառայողներ։

Մի կողմից Ադրբեջանը խախտում է հրադադարը, մյուս կողմից էլ հայկական կողմին է փոխանցում սեպտեմբերյան ագրեսիայի ժամանակ զոհված 13 հայ զինծառայողների մարմիններ, և այդ մասին առաջին տեղեկությունը հայտնում են ադրբեջանական լրատվամիջոցները։

Այսպիսով, փորձելով միջազգային հանրության մոտ տպավորություն ստեղծել, թե իրենք հումանիստաբար են վերաբերվում և պահպանում են պայմանավորվածությունները, մյուս կողմից էլ Հայաստանին են մեղադրում բոլոր պայմանավորվածությունները խախտելու մեջ։ Ստեղծված իրավիճակում չափազանց մտահոգիչ կարելի է համարել Հայաստանի արտգործնախարար Արարատ Միրզոյանի հարցազրույցը «Արմենպրեսին»։

Արտգործնախարարը հայտարարել է, թե պաշտոնական Բաքուն պատասխանել է խաղաղության պայմանագրի նախագծի շուրջ Երևանի ներկայացրած առաջարկներին, սակայն չի բացահայտել, թե ինչ առաջարկներ են ներկայացվել, մյուս կողմից Միրզոյանը հայտարարել է, թե Հայաստանի և Ադրբեջանի միջև սահմանագծումն ու սահմանազատումը պատմական քարտեզների հիման վրա իրականացնելու մասին Բաքվից հնչող հայտարարությունները խախտում են Պրահայում և Սոչիում ստանձնած հանձնառությունը երկու երկրների միջև սահմանազատման աշխատանքներն իրականացնել՝ հիմք ընդունելով ՄԱԿ կանոնադրությունը և Ալմա-Աթայի հռչակագիրը։

Արտգործնախարարը նաև ընդգծել է, թե չնայած տարբեր ուղղություններով ընթացող բանակցություններին՝ Ադրբեջանի կողմից չեն դադարում առավելապաշտական և ռազմատենչ հայտարարությունները հայկական կողմին ուղղված անհիմն մեղադրանքները և ուժի գործադրման սպառնալիքները։

«Ադրբեջանական զինված ուժերը շարունակում են գտնվել Հայաստանի ինքնիշխան տարածքում, պարբերաբար Ադրբեջանի կողմից տեղի է ունենում ռազմական սադրիչ գործողություններ։ Այս փաստերի համադրումը ցույց է տալիս, որ իրավիճակը շարունակում է չափազանց լարված մնալ և մեր միջազգային բոլոր գործընկերները պիտի հավելյալ ջանքեր գործադրեն՝ զսպելու Ադրբեջանի նկրտումները և պահպանելու Հարավային Կովկասում առկա փխրուն խաղաղությունը»,- ասել է Միրզոյանը՝ փաստելով, թե Ադրբեջանի նախագահը հնարավոր է էսկալացիայի պատասխանատվությունը վերցնում է իր վրա։

Որքան էլ հայկական կողմը ճղվի միջից՝ ապացուցելու, որ Ադրբեջանն է հրադադարի խախտողն ու սադրանքների գնացողը, փաստ է, որ Ադրբեջանը բավականին լուրջ դիվանագիտական գործունեություն է ծավալում և կարողանում է լրջորեն վնասել Հայաստանին միջազգային ասպարեզում։

Երեկ էլ Հարավային Կովկասի և Վրաստանի ճգնաժամի հարցերով Եվրամիության հատուկ ներկայացուցիչ Տոյվո Կլարն է տվիթերյան իր էջում անդրադարձել Ադրբեջան կատարած այցին և հայտարարել, թե շատ մարտահրավերներ դեռ մնում են։

Հայաստանին և Ադրբեջանին անհրաժեշտ են զսպվածություն և ուժեղ քաղաքական կամք՝ համապարփակ կարգավորման հասնելու և լարվածությունը թուլացնելու համար։ Այս և մյուս բոլոր փաստերը վկայում են, որ Ադրբեջանը լրջորեն մտադիր է խախտել հրադադարը և նոր ռազմական գործողություններ սկսել, իսկ Հայաստանի իշխանություններն ընդամենը խնդրարկուի դերում են հայտնվել։

Աննա Նադոյան