Ադրբեջանն աշխատում է Ռուբեն Վարդանյանի դեմ․ դաշնակիցներ ունեն նաև Հայաստանում

Ադրբեջանական իշխանությունները լայն քարոզչական և քաղաքական հարձակումների են անցել Արցախի պետական նախարար Ռուբեն Վարդանյանի դեմ։

Ռուսական РБК հեռուստաալիքը չի հրապարակել Լրագրող Իլյա Դորոնովի ազդարարած բացառիկ հարցազրույցը Ռուբեն Վարդանյանի հետ։ Արցախի պետնախարարի ոչ պաշտոնական թելեգրամյան ալիքի հաղորդագրության մեջ նշված է, թե ադրբեջանցիների սպառնալիքներն են։

«Իլյան հատուկ հարցազրույցի համար այցելել էր Հայաստան, խոսակցությունը տեսագրվել էր և ազդարարվել նրա կողմից, բայց РБК-ն հրաժարվել է հրապարակել այն։ Հրաժարման պատճառը ֆիզիկական հաշվեհարդարի սպառնալիքներն են, որոնք Իլյան և նրա ընտանիքի անդամները ստացել են սոցցանցերում ադրբեջանցի օգտատերերի կողմից՝ հարցազրույցի ազդարարումից հետո»,- նշված է գրառման մեջ։

Հիշեցնենք՝ Ադրբեջանի նախագահ Իլհամ Ալիևը նախօրեին էլ հայտարարել է, թե պատրաստ է բանակցել Լեռնային Ղարաբաղի ժողովրդի, բայց ոչ Ռուսաստանից հատուկ օրակարգով Արցախ ուղարկված Ռուբեն Վարդանյանի հետ։ Պետնախարարը Բաքվի բռնապետի այս հիստիերիկ հարձակումներին արձագանքել էր բավական կոռեկտ, դիվանագիտական ձևավակերպումներով, սակայն հստակ արձանագրումով, որ լիովին համապատասխանում է բանակցողի այն չափորոշիչներին, որը նշում է ինքը՝ Ադրբեջանի նախագահը։

Տարօրինակն այն է, որ Արցախի անունից Ռուբեն Վարդանյանի բանակցելու հնարավորության դեմ խոսում են ոչ միայն Ադրբեջանի նախագահն ու քաղաքական շրջանակները, այլ նաև որոշ քաղաքական միավորներ Հայաստանում և Արցախում։

Մինչդեռ պետք է հենց Հայաստանի և Արցախի քաղաքական դաշտը համախմբված դիրքորոշումներ ունենային այս պարագայում՝ հենց Ռուբեն Վարդանյանին լիազորելով ներկայացնել Արցախի ազգաբնակչությանը՝ հատկապես այն պայմաններում, երբ Հայաստանի իշխանությունները ձեռքերը լվացել են Արցախից էլ, Արցախի ժողովրդից էլ, Լեռնային Ղարաբաղի խնդրից էլ։

Տաթև Հախնազարյան