Փաշինյանի համար ռուսները տհաճ անակնկալ են պատրաստում

Երևանում նոյեմբերի 23-ին կայանալու է ՀԱՊԿ երկրների ղեկավարների գագաթաժողովը, որի շրջանակներում նախորդ օրը Երևան կժամանի Ռուսաստանի նախագահ Վլադիմիր Պոտինի գլխավորած պատվիրակությունը։ Ռուսական կողմը, մեր աղբյուրների փոխանցմամբ, բավական տհաճ անկանկալ է պատրաստում Նիկոլ Փաշինյանի համար։

Այս օրերին ռուսական իշխանության տարբեր շրջանակներ քննարկում են Պուտինի գլխավորած պատվիրակության կազմում Կոնստանտին Զատուլինին ընդգրկելու հարցը։ Հիշեցնենք, Հայաստանի վարչախումբը Զատուլինին շաբաթներ առաջ անցանկալի անձ է ճանաչել, արգելել նրա մուտքը Հայաստան։

Եվ այս քայլով Ռուսաստանը կարող է ցույց տալ Փաշինյանին, թե ով է իրավիճակի տերը։ Միևնույն ժամանակ Զատուլինին պատվիրակության կազմում ընդգրկելը որևէ կերպ խնդրահարույց չէ ՌԴ իշխանությունների համար։ Նա ՌԴ պետդումայում զբաղեցնում է ԱՊՀ գործերի, եվրասիական ինտեգրման և հայրենակիցների հետ կապերի հանձնաժողովի նախագահի պաշտոնը։

Առայժմ վերջնական որոշում չկա Կոնստանտին Զատուլինին պատվիրակության կազմում ընդգրկելու մասին, բայց մեր աղբյուրի պնդմամբ, մեծ հավանականությամբ հենց այդ կերպ էլ կվարվեն։

Ինա Ավագյան