Փաշինյանը մտածում է հեռացնել Պապիկյանին
ՎԵՐԼՈՒԾՈՒԹՅՈՒՆՆԵՐ
Պաշտպանության նախարարությունը վերջին օրերին ակտիվացրել է իր քարոզչական աշխատանքները, մասնավորապես առանց դադարի տեսանյութեր և քարոզչական նյութեր են հրապարակվում, այդ թվում ինչպես կանանց կրակային վարժանքների, այլև նաև պաշտպանության նախարարի և առանձին ստորաբաժանումների աշխատանքների իբր արդյունավետության վերաբերյալ։
Բանն այն է, որ «Քաղաքացիական պայմանագիր» կուսակցության վարչության ընտրությունների կեղծումից, ինչպես նաև Սուրեն Պապիկյանի բավականին լուրջ հավաքած քվեներից հետո, Պապիկյանի գլխին սև, մութ ամպեր են կուտակվել։
Նիկոլ Փաշինյանը ցանկանում է ազատվել Պապիկյանից և այժմ որոնում համապատասխան թեկնածուի։ Կասկածամիտ Փաշինյանին, լրջորեն մտահոգել է Պապիկյանի ստացած քվեները և հենց դա է պատճառը, որ հենց փաշինյանական մերձավոր շրջապատից են մամուլում տարածել ընտրությունների կեղծման մասին տեղեկությունները։
Ըստ էության, Փաշինյանը փորձում է վարչության ընտրությունների կեղծման ամբողջ մեղքը բարդել միայն Սուրեն պապիկյանի վրա, իսկ կեղծումներին անմիջական մասնակցություն ունեցած Արփի Դավոյանի, փոխվարչապետ Համբարձում Մաթևոսյանի և Պապիկյանի կադրերը համարվող այլ անձանց նկատմամբ՝ Փաշինյանը միայն ներքին սանկցիաներ է կիրառելու և նրանց պարտադրելու է անցնել իր թրի տակով՝ հրաժարվելով Սուրեն Պապիկյանի գերիշխանությունը ընդունելուց։
Փաշինյանն այժմ տենդագին պաշտպանության նախարարի թեկնածուի որոնումների մեջ է, ավելին, տեղեկություններ են շրջանառվում ՔՊ-ում, որ այդ պաշտոնը բաժինը հասնելու է Ազգային ժողովի պաշտպանության և անվտանգության հարցերի հանձնաժողովի նախագահ Անդրանիկ Քոչարյանին։
Վերջինս տևական ժամամակ ցանկանում է ինքը զբաղեցնել իր համար բաղձալի պաշտոնը, որտեղ տասնամյակներ առաջ փոխնախարար է եղել, իսկ Ազգային ժողովի պաշտպանության և անվտանգության հարցերի հանձնաժողովի նախագահ առաջարկել է իր տեղակալ, նախկին ոստիկան արմեն Խաչատրյանի թեկնածությունը։ Թերևս դա է պատճառը, որ Ազգային ժողովում 44-օրյա պատերազմի հանգամանքների ուսումնասիրման քննիչ հանձնաժողովը արդեն բավական ժամանակ նիստեր չի գումարել և ընդհանրապես մատնվել է պարապուրդի։
Սերինե Բադալյան
