Ամերիկացի կոնգրեսականները Հայաստան են եկել զինվորականների ուղեկցությամբ

Երեկ Երևան է ժամանել ԱՄՆ ներկայացուցիչների պալատի Ժողովրդավարական գործընկերության հանձնախմբի նախագահ Դեյվիդ Փրայսի գլխավորած կոնգրեսական պատվիրակությունը։ Փրայսին ուղեկցում են պալատի անդամներ՝ Դիանա Դեգեթը, Ջիմ Քուպերը և Էնդի Լեվինը։ Երկօրյա այցի ընթացքում նախատեսված է պատվիրակության հանդիպումները Նիկոլ Փաշինյանի, ԱԺ նախագահ Ալեն Սիմոնյանի հետ, կքննարկվեն հայ-ամերիկյան հարաբերությունները։

Այսօր նախատեսված է Ազգային ժողովի Արտաքին հարաբերությունների մշտական հանձնաժողովի նախագահ Էդուարդ Աղաջանյանի և Դեյվիդ Փրայսի մամուլի ասուլիսը։ Պատվիրակության անդամները միայն ծաղկեպսակներ կդնեն Հայոց ցեղասպանության հուշահամալիրում, կհանդիպեն ընդդիմադիր ուժերի հետ։

Նախօրեին ԱՄՆ-ի հայ դատի հանձնախմբից հայտնել էին, որ Հայաստան են այցելելու 7 կոնգրեսականներ։ Բիլի Լոնգը, Ջերի Քոներին և Ջոն Գարամենդին թերևս Հայաստան կայցելեն մեկ այլ պատվիրակության կազմով։ Իշխանամետ լրատվամիջոցների փոխանցմամբ՝ Հայաստան ժամանած ամերիկյան պատվիրակության կազմում նաև զինվորականներ կան, սակայն նրանց ինքնությունը և այցի նպատակները հայտնի չեն։

Ըստ ամենայնի, Արևմուտքը փորձում է ավելացնել իր ազդեցությունը տարածաշրջանում և կոնգրեսականների հետ նաև զինվորականներ է ուղարկում։ Հայաստանի պաշտպանության նախարար Սուրեն Պապիկյանը, հիշեցնենք, դեռևս Նենսի Փելոսի այցի ժամանակ, հանդիպել է նրա հետ և , ըստ որոշ տեղեկությունների, ամերիկյան կողմից զենք է խնդրել, իսկ Նիկոլ Փաշինյանը Ռուսաստանին մեղադրում էր Հայաստանի գումարները գրպանելու և զենք չվաճառելու մեջ։ Այս ամենը իրականացվում է միջազգային և տեղեկատվական ֆոն ստեղծելու՝ Ռուսաստանին տարածաշրջանից դուրս մղելու համար։

Չի բացառվում, որ լրացուցիչ նոր լարվածության ու ռազմական բախումների պատճառ դառնան։ Ռուսաստանը, որ 200-ամյակից ավել գտնվում է Հարավային Կովկասում, հենց այնպես իր ազդեցությունը չի հանձնի արևմտյան պետություններին, իսկ Նիկոլ Փաշինյանի իշխանությունը այս պարզ ճշմարտությունը չի հասկանում, նույնիսկ Ուկրաինայում թուլացած Ռուսաստանը, այնքան թույլ չէ, որպեսզի թույլ տա Նիկոլ Փաշինյանին իրագործելու իր դավադրությունը։

Մանե Կարապետյան