ՀԱՊԿ-ն լքելու կոչերը խնդիրներ են հարուցելու Ռուսաստանում

Ստեղծված իրավիճակը շփման գծում և Հայաստանում օրեցօր սաստկացող հայտարարությունները ՀԱՊԿ-ն լքելու, ինչպես նաև հակառուսական տրամադրություններ Հայաստանում գեներացնելու ուղղությամբ, մտահոգել են ռուսական քաղաքական շրջանակներին։

Եթե Ռուսաստանի բարձրագույն իշխանությունը առայժմ թեթև ակնարկներով է փորձում Հայաստանի գործող իշխանություններին բացատրել նման վարքի անընդունելիությունը և անթույլատրելիությունը, ապա ռուսական որոշակի քաղաքական գործիչներ պարզ և հստակ ակնարկում են, որ Հայաստանը կարող է խնդիրներ ունենալ նման պարագայում։

ՌԴ Դաշնության խորհրդի պաշտպանության և անվտանգության կոմիտեի ղեկավար Վիկտոր Բոնդարևն է հայտարարել, որ ՀԱՊԿ-ից դուրս գալու կոչերով ակցիաները Հայաստանում ֆինանսավորված են ԱՄՆ-ի կամ ամերիկամետ ուժերի կողմից։ Բոնդարևը նշել է, որ հայ-ռուսական հարաբերությունները շարունակում են կայուն մնալ՝ չնայած դեպի Արևմուտք Հայաստանին շեղելու փորձերին։

«Հայաստանին վաղուց են դրդում Արևմուտքի կողմ թեքվել, սակայն հայ-ռուսական հարաբերությունները դեռևս կայուն են, բարիդրացիական և գործընկերային, ինչպես երկկողմ, այնպես էլ բարձրակողմ միջազգային դաշինքը և կազմակերպությունների կազմում։ Այնուամենայնիվ ԱՄՆ-ն ու նրա կամակատարներն ամեն գնով ձգտում են սեպ խրել մեր մեջ»,- գրել է Բոնդարևը։

Թերևս այս շարքում կարելի է նաև առանձնացնել ռուսական ԶԼՄ-ների վերջին օրերի հաղորդագրություններն ու թոք շոուները, որտեղ Հայաստանի իշխանություններին պարզ և բացահայտ մեղադրում են հակառուսական տրամադրություններ գեներացնելու մեջ, ինչը թերևս վկայում է, որ Ռուսաստանին լրջորեն մտահոգել է նման հանգամանքը։

Մինչդեռ իրականում Ռուսաստանը ունի մեկ անելիք՝ ցույց տալու և կատարելու իր դաշնակցային պարտավորությունները, ինչի պարագայում Հայաստանում արևմտամետ քաղաքական ուժերին բարդ կլիներ նման տրամադրություններ տարածել, հատկապես, որ խաղաղապահների անգործության և ՀԱՊԿ-ի իրավիճակին համարժեք չարձագանքելու պարագայում բնավ էլ դժվար չէ Հայաստանում հակառուսական տրամադրություններ առաջացնելը։

Այս առումով մտահոգվելու, հնարավոր զարգացումներից մտահոգվելու տեղ ունի թե՛ Հայաստանը և թե՛ Ռուսաստանը, քանի որ հատկապես պատերազմական վիճակում զարգացումները կարող են անդառնալի և ծանր լինել։ Եթե Հայաստանի դեպքում այդ խնդիրները գոյութենական են, ապա Ռուսաստանի դեպքում լուրջ քաղաքական։ Հարավային Կովկասը կարող է հայտնվել թուրքական ազդեցության գոտում, իսկ Ռուսաստանին դուրս մղեն ոչ միայն Հայաստանից, այլ նաև Արցախից։ Ըստ էության, հայ-ռուսական հարաբերությունները վերբեռնման լրջագույն կարիք ունեն և պետք է անհապաղ իրականացնել դա։

Ռոբերտ Արշակյան