Փաշինյանական վարչախումբը փորձում է ապացուցել անապացուցելին
ՎԵՐԼՈՒԾՈՒԹՅՈՒՆՆԵՐ
2018 թվականի իշխանափոխությունից հետո Նիկոլ Փաշինյանի տարասեռ թիմին մշտապես մեղադրել են հակառուսականության մեջ։ Թերևս դրա համար բավարար հիմքեր կային, թե՛ նախկինում այդ թիմի կարկառուն որոշ ներկայացուցիչների պահվածքը, հակառուսական ակցիաներին նախկին ակտիվ մասնակցությունը, թե՛ նաև նախքան 44-օրյա պատերազմը, գործող իշխանությունների հոխորտանքները Ռուսաստանի հասցեին։
Պատերազմում կրած խայտառակ պարտությունից հետո Նիկոլ Փաշինյանի իշխանությունն այլևս ամեն ինչով կախված է Ռուսաստանից և առիթ է փնտրում ցույց տալու իր հավատարմությունը։ Վերջին շրջանում, թերևս միայն խաղաղապահների հետ կապված դեպքն էր, որ Փաշինյանը համարձակություն ունեցավ մի քանի կցկտուր խոսք ասելու, քննադատելու ռուս խաղաղապահների գործողությունները։
Երեկ աշխատանքային այցով Ռուսաստան է մեկնել Պաշտպանության նախարար Սուրեն Պապիկյանը՝ մասնակցելու ցուցահանդեսին և զորավարժություններին, ինչպես նաև հանդիպել է Ռուսաստանի Պաշտպանության նախարար Սերգեյ Շոյգուի հետ։ Տարածված հաղորդագրությունները, տեսանյութը, ինչպես նաև ռուսական լրատվամիջոցների լուսաբանումը վկայում է, որ փաշինյանական իշխանության առաջատար ներկայացուցիչը գլխիկոր լսել է Շոյգուին, ստորաքարշ և գլխահակ կանգնել նրա առջև և անընդհատ շեշտել Ռուսաստանում ռուսական խաղաղապահ զորախմբի կայունացնող դերը շփման գծի ամբողջ երկայնքով։
Պապիկյանը նշել է, թե իրավիճակը շարունակում է լարված մնալ։ Կողմերը, ըստ Հայաստանի ՊՆ պաշտոնական հաղորդագրության, կարևորել են իրադրության հետևողական և շարունակական կայունացման ուղղությամբ քայլերի ձեռնարկման անհրաժեշտությունը՝ շեշտադրելով Ռուսաստանում խաղաղապահ առաքելությունն իրականացնող ռուսական զորախմբի դերակատարությունն այս հարցում։
Փաստացի Պապիկյանը գնացել էր Շոյգուի մոտ ներողություն խնդրելու Նիկոլ Փաշինյանի հոխորտանքների համար և ասելու, թե դա իբր Հայաստանի իշխանության իրական դիրքորոշումը չէ և փաշինյանական իշխանությունը «շոյված է» ռուսական խաղաղապահ զորախմբի ներկայությունից։ Ըստ էության, հենց այդպես էլ պետք է լիներ, հատկապես, որ Փաշինյանի հայտարարություններից հետո նա մի քանի լուրջ քննադատություններ ստացավ ռուսական պաշտոնական մարմիններից։
Մհեր Ավետիսյան
