«Սուրմալուի» ողբերգությունը՝ կոլեկտիվ անպատասխանատվության ցուցիչ

«Սուրմալու» առևտրի կենտրոնում տեղի ունեցած պայթյունը ևս մեկ անգամ ի ցույց դրեց Հայաստանի իշխանությունների և հանրության բացառիկ անպատասխանատվությունը, ամեն գնով գումար աշխատելու ցանկությունը, անվտանգության տարրական միջոցառումների վրա թքած ունենալու հանգամանքը։ Մի քանի զոհ, վեց տասնյակից ավելի վիրավորներ, տասնյակ անհայտ կորածներ։ Աշխարհի ցանկացած երկրում նման միջադեպի պարագայում հանրությունը ինքնակազմակերպվում և առնվազն չի խանգարում արտակարգ ծառայություններին, ոստիկանությանը, փրկարարներին՝ կատարել իրենց աշխատանքը։

«Սուրմալու»-ում տեղի ունեցածը վկայեց, որ մեր հանրությունը ոչ միայն ադեկվատ չէ գործող իրողություններին, այլ ավելի շուտ վստահում է դավադրությունների տարբեր տեսությունների, ամեն տեսակ անհեթեթ երևույթների, քան գործող իշխանություններին, և դա կարելի է ասել օրինաչափ է։ Տեսչական մարմինը դեռևս 2021 թվականին տասնյակ խախտումներ էր արձանագրել տվյալ տարածքում, սակայն որևէ մեկը ո՛չ պատժվել էր, ո՛չ էլ համապատասխան կերպով նրա բիզնեսը կասեցվել էր։ Եվ արդյունքում բազմամարդ տարածքում հրավառության նյութերի պահեստ էր գործում, որն էլ երեկ պայթել է։

Բարդ է ասել ահաբեկչությո՞ւն է, թե՞ դժբախտ պատահար, քանի որ քննչական մարմինները դեռևս որևէ գործ չեն իրականացնում, սակայն այս ողբերգական դեպքը հերթական անգամ ապացուցեց, որ Հայաստանի կառավարման համակարգը ադեկվատ չէ և իրողություններին արձագանքում է միայն պոստֆակտում, այլ ոչ թե փորձում կանխել ողբերգությունը։ Ավելին, «Սուրմալու»-ում կատարվածից հետո, Արտակարգ իրավիճակների նախարարությունում ահազանգեր են ստացել պետական նշանակության կարևորագույն օբյեկտներում ռումբերի տեղադրման վերաբերյալ։ Որևէ հատվածում, իհարկե որևէ ռումբ չկար, սակայն պարալիզացվել էր քաղաքը, կաթվածահար էր եղել մետրոպոլիտենի աշխատանքը, իսկ հազարավոր մարդիկ հերթական անգամ տուն էին գնացել դառնությամբ՝ հասկանալով, որ իրենք գործ ունեն ոչ թե պետության, այլ ինչ-որ մի անիմաստ և անհեթեթ օրգանիզմի հետ, որը ոչ թե զբաղված է իրենց կյանքը հեշտացնելով, այլ ընդհակառակը՝ բարդացնելով և մարդկանց առօրյան դժոխք դարձնելով։

Ցավակցում ենք բոլոր զոհերի հարազատներին, վիրավորներին շուտափույթ ապաքինում մաղթում, բայց հերթական անգամ արձանագրեցինք, որ 2018 թվականին իշխանության եկած քաղաքական ուժը որևէ կերպ չի կարողանում կառավարել խնդիրները։ Եվ մարդիկ, ովքեր իշխանության գալուց հետո խոստացել էին, որ այլևս Երևանում հրավառության նյութեր թույլ չեն տալու, ընդամենը կարողանում են ֆեյսբուքում ստատուսներ գրել, անհեթեթ և վտանգավոր նարատիվներ տարածել, սակայն որևէ կերպ չեն կարողանում լուծել հանրության խնդիրները։ Օր առաջ հարկավոր է ուշքի բերել Հայաստանի Հանրապետության քաղաքացիներին, Հայաստանի Հանրապետությունը, բարձրացնել մարդկանց և պետական համակարգի դիմադրողականությունը, որպեսզի նման իրավիճակներում գործեն վստահ, խելամիտ, այլ ոչ թե խուճապի մատնվեն։ 

Ռոբերտ Վիրաբյան