Թուրքական շահերի իշխանական քարոզիչները անձնական շահ ունեն

Հայ-թուրքական սահմանի բացումը անկախ իր քաղաքական և երկրի համար ծանր տնտեսական պայմաններից, նաև մեկ այլ կարևոր նշանակություն ունի գործող իշխանությունների համար։ Եվ ահա թե ինչն է պատճառը, որ փաշինյանական վարչախումբը շտապում է օր առաջ բացել հայ-թուրքական սահմանը։

Իշխանությանը մերձ օլիգարխների մի խումբ, մեր տեղեկությունների համաձայն, արդեն իսկ սկսել է լուրջ տնտեսական կապեր հաստատել Թուրքիայում աշխատող գործարարների հետ։ Նրանց արտոնյալ պայմաններ են առաջարկում Հայաստանում աշխատելու համար, հրավիրում են Հայաստան՝ խոստանալով, որ հենց իրենք կարող են լուծել բոլոր խնդիրները։

«Քաղպայմանագրում» մեր աղբյուրի փոխանցմամբ, այդ գործում հատկապես լրջորեն առաջ են ընթացել գործարարներ Գուրգեն Արսենյանն ու Խաչատուր Սուքիասյանը, որոնք իրենց գործընկերների միջոցով թուրք գործարարներին առաջարկում են սահմանը բացելուց հետո համատեղ բիզնես-պրոյեկտներ իրականացնել՝ խոստանալով տանիք կանգնել Հայաստանում, օգնել նրանց իշխանության և հարկային մարմինների հետ, իրենց խնդիրները լուծելու հարցերում։

Մասնավորապես, մեր աղբյուրի փոխանցմամբ, այս գործարարները հետաքրքրություններ ունեն Թուրքիայից ցանկացած տեսակի ներմուծման վրա՝ սննդամթերքի, տեքստիլի, գյուղատնտեսական արտադրանքի։ Ավելին, «Քաղպայմանագրի» որոշ պատգամավորներ մտավախություն ունեն, որ թուրքական սահմանը բացելուց հետո, Հայաստան նաև ադրբեջանական արտադրանք կբերվի թուրքականի անվան տակ, և հենց այդ ժամանակ էլ առավել շատ կպահանջվի իշխանությանը սերտ օլիգարխների աջակցությունը։

Փաստն այն է, որ փաշինյանական վարչախումբը խտրականություն չի դնում միջոցների մեջ և հարստանալու իր ուղիներն է մտմտում։ Այդ ճանապարհին բնավ էլ դեմ չեն աշխատել թշնամու ներկայացուցիչների հետ, և հենց դա է պատճառը, որ տևական ժամանակ թե՛ Արսենյանը, թե՛ Խաչատուր Սուքիասյանը հայ-թուրքական սահմանի բացման, թուրքերի հետ նորմալ հարաբերվելու լոբբինգ են իրականացնում։

Ի դեպ նրանք նաև տեղի հայ գործարարներին են առաջարկում իրենց ծառայությունները՝ նշելով, որ սահմանի բացումից հետո, հենց իրենք են լինելու բիզնեսի տանիքը, իսկ մյուս գործարարները կարող են իրենց միջոցով հարաբերվել թուրքերի հետ և Հայաստան ապրանք ներմուծել։

Մովսես Մարտիրոսյան