Փաշինյանը սեպ է խրում Հայաստանի և Սփյուռքի միջև

Այն, ինչ վերջին օրերին կատարվում է Սփյուռքի ակտիվ ներկայացուցիչների հետ փաշինյանական վարչախմբի հրահանգով, ոչ այլ ինչ է, քան Հայաստանի և Սփյուռքի միջև սեպ խրելու գիտակցված և միտումնավոր գործողություն։

ՀՅԴ Նիդերլանդների երիտասարդական միության անդամ Սյունե Աբրահամյանի մուտքն է արգելվել Հայաստան, նրան 12 ժամից ավելի պահել են Զվարթնոց օդանավակայանում՝ առանց բացատրություն ներկայացնելու հայտնել են, թե անցանկալի անձ է և պետք է վերադառնա Նիդերլանդներ։

Երեկ երեկոյան ժամեր շարունակ օդանավակայանում է պահվել նաև Նիդերլանդների Հայ դատի գրասենյակի ղեկավար Մասիս Աբրահամյանը։ Ընդսմին, նույնիսկ թույլ չեն տվել նրա փաստաբան Ռուբեն Մելիքյանի մուտքն իր վստահորդի մոտ, որպեսզի կարողանան համապատասխան փաստաթղթեր լրացնել և բողոք ներկայացնել իրավապահ մարմինների ապօրինությունների կապակցությամբ։

Թե՛ Մասիս Աբրահամյանը, թե՛ Սյունե Աբրահամյանը այս տարվա մայիսին Նիկոլ Փաշինյանի Նիդերլանդներ այցի ժամանակ նրա դեմ բողոքի ակցիաների ակտիվ կազմակերպիչներից էին։ Հիշեցնենք, որ օրեր առաջ էլ արգելվել էր ֆրանսահայ Մուրադ Փափազյանի մուտքը։ Վարչապետի այցի ժամանակ Փարիզում իբր անկարգություններ հրահրելու համար։

Տարօրինակն այն է, որ երեկ նաև արգելվել էր նախկին արտգործնախարար, «Ժառանգություն» կուսակցության նախագահ Րաֆֆի Հովհաննիսյանի մուտքը Արցախ, երբ Հովհաննիսյանը մեկնում էր իր թոռան մկրտությանը մասնակցելու, ռուս խաղաղապահները կանգնեցրել են նրան Աղավնոյում և արգելել առաջ գնալ։ Ընդ որում «Ժառանգություն» կուսակցությունը հստակ նշում է, թե մեղավորը ոչ թե ռուս խաղաղապահներն են, կամ Արցախի իշխանությունները, այլ իրեն տեղեկացրել են, որ հրահանգը եկել է Հայաստանից՝ ամենավերևից։

Փաստացի, Սփյուռքում մեծ ճանաչում և հեղինակություն վայելող Րաֆֆի Հովհաննիսյանի մուտքի արգելքը ևս կարելի է դասել սփյուռքահայ դաշնակցականների դեմ բռնաճնշումների հետ, նույն գծում քանի որ Հովհաննիսյանն ինքն էլ հանդես է գալիս արմատական ընդդիմադիր դիրքերից։ Նիկոլ Փաշինյանը ամեն գնով ցանկանում է վնասել Սփյուռքին, կտրել նրա կապը Հայաստանի հետ, նաև վրեժ լուծել այն մարդկանցից, ովքեր համարձակվել են իրենց բողոքի ձայնը բարձրացնել գործող իշխանությունների ապօրինությունների դեմ։

Փաշինյանական վարչախումբը թքած ունի, որ Հայաստան-Սփյուռք-Արցախ եռամիասնության դեմ, իր կատարած ապօրինությունները միայն վտանգում են Հայաստանի Հանրապետությանը։ Բազմաթիվ վերլուծաբաններ չեն բացառում, որ սա թուրք-ադրբեջանական տանդեմի հրահանգը կարող է լինել։ Հայաստանը Թուրքիայի համար այդքան մեծ գլխացավանք չի ներկայացնում, ինչքան տարիներ շարունակ Թուրքիայի դեմ արտերկրում պայքար մղած ակտիվ կառույցները, լոբբիստական խմբերը, որոնք լուրջ փորձ են կուտակել Թուրքիայի կատարած գազանությունները աշխարհին ներկայացնելու և տարբեր երկրներում եղանակ ստեղծելու առումով։ Եվ հենց դա է պատճառը, որ փաշինյանական վարչախումբը ամեն ինչով նպաստում է թուրքական օրակարգն առաջ մղելուն։ 

Դանիել Պետրոսյան