Թուրքական լկտիությունը սահմաններ չի ճանաչում

Աշխատանքային այցով Երևանում գտնվող Միավորված ազգերի կազմակերպության Գլխավոր ասամբլեայի նախագահ Աբդուլլա Շահիդը Թվիթերի իր պաշոնական էջից պարզապես ջնջել է Ցեղասպանության զոհերի հուշահամալիր այցի վերաբերյալ իր թվիթը։

Պաշտոնյան գրառման մեջ նշել էր, որ ծաղկեպսակ է դրել Ցեղասպանության զոհերի հուշահամալիրում ու շնորհակալություն էր հայտնել ցեղասպանության թանգարանի տնօրենին շրջայցը կազմակերպելու համար։

Ծիծեռնակաբերդ ՄԱԿ-ի Գլխավոր ասամբլեայի նախագահի այցին պաշտոնական Անկարան էր արձագանքել՝ կոշտ քննադատության ենթարկելով պաշտոնյայի քայլը։

Թուրքիայի արտաքին գործերի նախարարությունը երեկ առանձին մամուլի հաղորդագրություն է տարածել։

«Մեր ընկալումն է, որ ՄԱԿ-ի Գլխավոր ասամբլեայի 76-րդ նստաշրջանի նախագահ, Մալդիվների արտաքին գործերի նախարար Աբդուլլա Շահիդի այցը Հայաստան օգտագործվել է հայկական միակողմանի պահանջները բացահայտելու նպատակով, և հենց այդ համատեքստում է, որ նա այցելել է այսպես կոչված` ցեղասպանության հուշահամալիր»,- նշել էին Թուրքիայի ԱԳՆ-ից։

Ինքը՝ Աբդուլլա Շահիդը որևէ մեկնաբանություն չէր արել։ Ավանդաբար և արարողակարգի համաձայն՝ օտարերկրյա պատվիրակություններն այցելում են Ծիծեռնակաբերդ, հարգանքի տուրք մատուցում Ցեղասպանության զոհերի հիշատակին։ Թերևս առաջին անգամն է, որ Թուրքիան նման կտրուկ արձագանք է ցուցաբերում և հաջողում։

Ըստ ամենայնի, թուրքական այս լպիրշությունն առաջիկայում ավելի է ընդարձակվելու, իսկ Հայաստան այցելող պատվիրակություններն արժանանալու են նման վերաբերմունքի թշնամի երկրի ԱԳՆ-ի կողմից։ Անգամ իմաստ չկա տարակուսել Հայաստանի ապիկար իշխանությունների վարքից, որ որևէ բառով չեն մեկնաբանել իրավիճակը։

Թուրքիայի խամաճիկի վերածված փաշինյանական խմբակից ավելի սպասելիք ունենալ չարժե։ 

Վահրամ Խաչատրյան