Ռուբեն Վարդազարյանը հրաժարվել է տրամադրել ձայնագրությունը

Բարձրագույն դատական խորհրդի նախագահ Ռուբեն Վարդազարյանը երեկ հարցաքննվել է քննչական կոմիտեում աղմկահարույց ձայնագրության փաստով, սակայն մերժել է քննիչի՝ ձայնագրության ամբողջական տարբերակը տրամադրելու խնդրանքը։ Մեր տեղեկություններով, քննիչը փորձել է ստանալ ձայնագրության ամբողջական՝ մոտ 2,5 ժամ տևած տարբերակը, սակայն Վարդազարյանը պատասխանել է՝ բացառվում է։

ԲԴԽ նախկին նախագահն ասել է, թե հրապարակել է ձայնագրության միայն իրեն վերաբերող հատվածը, իսկ ամբողջական ձայնագրության մեջ ուշագրավ և զգայուն տեղեկություններ կան թե՛ նախկինների, թե՛ գործող իշխանությունների օրոք ազդեցիկ պաշտոնյաների վերաբերյալ, ուստի հարկ չի համարում այդ ձայնագրությունը տրամադրել Քննչական կոմիտեին։

Հիշեցնենք, որ հունիսի 20-ին հրավիրված ասուլիսում Բարձրագույն դատական խորհրդի նախկին նախագահ Ռուբեն Վարդազարյանը հրապարակել էր ԲԴԽ նախագահի պարտականությունները կատարող Գագիկ Ջհանգիրյանի հետ ունեցած զրույցի ձայնագրությունը, որում մի շարք հետաքրքիր դրվագներ են բացվում՝ կապված դատական համակարգի վրա ճնշումներ գործադրելու հետ։

Անցած տարվա փետրվարին արված գաղտնի ձայնագրությունում Գագիկ Ջհանգիրյանը հորդորում է այն ժամանակ դեռ ԲԴԽ նախագահի պաշտոնը զբաղեցնող Ռուբեն Վարդազարյանին հրաժարական տալ և խոսում է քրեական գործերի ընթացքին միջամտելու մասին։ Աղմկահարույց ձայնագրության հրապարակումից հետո ԲԴԽ-ն կասեցրեց Վարդազարյանի լիազորությունները, Գագիկ Ջհանգիրյանն էլ հրաժարական ներկայացրեց հուլիսի 1-ին։

Սերոբ Մամիկոնյան