Հայաստանի սահմանների շուրջ առևտուրը շարունակվում է

Հայաստանի սահմանների շուրջ առևտուրը շարունակվում է և նորանոր սպառնալիքներ է հարուցում մեր երկրի համար։ Նախօրեին ռուսական «ՏԱՍՍ» գործակալությունը հայտնեց, թե Հայաստանի, Ադրբեջանի ու Ռուսաստանի փոխվարչապետների աշխատանքային խմբին հաջողվել է մոտեցնել Երևանի և Բաքվի շատ հարցերով, մասնավորապես սահմանային և մաքսային հսկողության հարցով դիրքորոշումները։

Ռուսական լրատվամիջոցին այդ մասին հայտնել էր փոխվարչապետ Մհեր Գրիգորյանը։

«Հարավային Կովկասում տրանսպորտային կապերի ապաշրջափակման հարցով եռակողմ աշխատանքային խմբի գործունեությունը կառուցողական եմ համարում, դա անկասկած բարդ աշխատանք է, սակայն պետք է նշեմ, որ կողմերին հաջողվել է մոտեցնել շատ հարցերով դիրքորոշումները»։

Մհեր Գրիգորյանը նշել էր, թե տվյալ պահին փորձագիտական ենթախմբերը շարունակում են մշակել ավտոմոբիլային և երկաթուղային ենթակառուցվածքների հետագա օգտագործման և վերականգնման հետ կապված հարցերի մշակումը։ Իսկ երեկ արդեն ռուսական մի շարք լրատվամիջոցներ, վկայակոչելով իրենց անանուն բարձրաստիճան աղբյուրները, հայտնել են, թե Ռուսաստանը Հայաստանին և Ադրբեջանին օգնել է համաձայնության գալ այսպես կոչված «Զանգեզուրի միջանցքով» ավտոմայրուղու շուրջ, մնացել է համաձայնեցնել միայն 6 կմ-ոց փոքր հատվածը։

Ըստ աղբյուրի՝ ռուսական «Ավտոդոր» ընկերությունը կօգնի ավարտել երթուղու համակարգումը, իսկ ձգձգումը պայմանավորված է տեղանքի լեռնային ռելիեֆով։ Երթուղու մնացած 40 կմ-ում կօգտագործեն հին խորհրդային ճանապարհներ, որոնք կվերանորոգվեն։ Ռուսական լրատվամիջոցները նշում են, որ Երևանն արագացրել է նախագծի հաստատումը այն բանից հետո, երբ Բաքուն սկսել է մտածել երթուղի կառուցել ոչ թե Հայաստանով, այլ՝ Իրանով, ընդ որում նշվում է, թե ձգձգման հիմնական պատճառը երկու կողմերի միջև վստահության բացակայությունն է և եռակողմ համաձայնագրի տեքստերի ընթերցման տարբերությունը։

Ճանապարհն անցնելու է Մեղրիի հատվածով, սակայն առայժմ որևէ կերպ չեն հայտնում, թե այդ միջանցքի նկատմամբ վերահսկողությունը միայն ռուսական կո՞ղմն է իրականացնելու, թե՞ հաշվի են առնելու նաև հայկական կողմի շահերը։

Ըստ էության, այսպես կոչված «Զանգեզուրի միջանցքի» շուրջ Ադրբեջանի և Ռուսաստանի դիրքորոշումների մեկտեղումը, ինչպես նաև հայկական կողմի չափազանց խեղճացած վիճակը, վկայում են, որ Հայաստանի Հանրապետության դեմ հերթական դավադրությունն է իրականացվում, ընդ որում սովորույթի համաձայն՝ դեպքի մասին Հայաստանին տեղյակ կպահեն միայն վերջին պահին, երբ արդեն այլևս իրողությունը կատարված կլինի։

Նշենք, որ Ադրբեջանի նախագահ Իլհամ Ալիևը Աշխաբադում «Կասպյան հնգյակի» հետ հանդիպման ժամանակ արդեն իսկ հայտարարել է, թե «Զանգեզուրի միջանցքը» իրականություն է։ Որքան էլ Հայաստանի իշխանությունները փորձում են հերքել, նշել, թե եռակողմ համաձայնություններում նման պայմանավորվածություն չկա, ակնհայտ է, որ Հայաստանը խուսանավելու քիչ հնարավորություններ ունի և ի վերջո ստիպված է լինելու ընկրկել ճնշումների առջև։ 

Հարություն Պետրոսյան