Վաչե Թովմասյանը՝ դստեր ծննդյան եւ «Քարե դարդ» սիթքոմի լոսանջելեսյան համերգի մասին

Օրերս վիտամինցի Վաչեի կյանքում լուրջ փոփոխություն տեղի ունեցավ: Հունվարի 25-ին ծնվեց նրա եւ կնոջ՝ Գայանե Մանուկյանի առաջնեկը: Աղջկան կնքեցին Միա անունով: Armtimes.com-ի հետ զրույցում դերասանը կիսվեց զգացողություններով:

«Խառը զգացողություններ ունեմ՝ իրարամերժ, հիացմունքի, պատասխանատվության զգացում: Արդեն 30 տարեկան եմ, գիտակցված գնացինք երեխա ունենալու քայլին, ու շատ սպասված էր: Ամեն ինչ լավ է: Հիացած եմ: Էուֆորիայի մեջ եմ»,- ասաց նա:

Վաչեն պատկերացնում է, թե ինչպիսի հայր է լինելու: Նա լինելու է ոչ շատ խիստ, ոչ էլ ամեն ինչ թույլատրելու է Միային: Ընդգծում է, որ իր ու կնոջ համար երեխային ճիշտ դաստիարակություն տալը շատ կարեւոր է:

«Չեմ կարծում, որ երես տամ, բայց չեմ էլ կարծում, որ կկարողանամ շատ խիստ լինել. էմոցիոնալ մարդ եմ: Պետք է ամեն ինչ անենք, որ դաստիարակության հարցում թույլ չլինենք»,- ասաց նա:

Վաչեն եւ Գայանեն չեն սահմանափոկվելու 1 երեխայով: Նրանք ցանկանում են, որ տանը շատ երեխաներ լինեն:

«Ամենաքիչը 3 երեխա: Առաջինը հենց աղջիկ էի ուզում, ու շատ ուրախ եմ: Հիմա արդեն տղա եմ ուզում երեկվանից (ծիծաղում է)»,- ասաց նա:

Վաչեն չի մոռանում աշխատանքի մասին: Այս շրջանում ընթանում են «Քարե դարդ» սիթքոմի 4-րդ եթերաշրջանի սցենարային աշխատանքները, եւ շուտով կսկսվեն նկարահանումները: Բացի այդ՝ հեռուստանախագծի անձնակազմը պատրաստվում է արտասահմանյան շրջագայության:

«Մայիսի 21-ին ԱՄՆ-ում՝ Լոս Անջելեսում, համերգ ենք ունենալու՝ «Քարե դարդ» շոու, ու դրա սցենարային աշխատանքներն են նաեւ հիմա ընթանում: Դրանք սկսել էինք ամռանը: Հիմա արդեն վերջնական տեսքի ենք բերում, որ սկսենք փորձերը: Կարծում եմ՝ լոսանջելեսյան ներկայացումից հետո նաեւ Հայաստանում կունենանք ներկայացումներ, որպեսզի մեզ սիրողները կարողանան նաեւ այստեղ մեզ նայել»,- ասաց նա՝ ավելացնելով, որ կան նաեւ այլ պրոեկտներ, որոնց մասին առայժմ չի ցանկանում խոսել:

«Քարեն դարդ»-ի 2-րդ եթերաշրջանից բացակայում է գլխավոր կերպարներից մեկին՝ Գոգոյին, մարմնավորող Արմուշը: Նա մեկնել էր ԱՄՆ հոր կողքին լինելու համար, քանի որ նա առողջական խնդիրներ ուներ: Վաչե Թովմասյանը նշում է, որ համերգին Արմուշը կմասնակցի: