Փաշինյանական պատգամավորներին զրկում են արձակուրդից՝ հանուն պարագլխի

Հայաստանի խորհրդարանը երեկ ավարտեց 8-րդ գումարման 3-րդ նստաշրջանի աշխատանքները Հայաստանի օրհներգի հնչյունների ներքո։ Այդուհանդերձ խորհրդարանի պատգամավորներին չի հաջողվի լիակատար ամառային հանգիստ ունենալ։ Իշխանություններն առաջիկայում մի ամբողջ շարք արտահերթ նիստեր գումարելու ծրագրեր ունեն, մասնավորապես հաջորդ շաբաթ Պաշտպանության մասին օրենքն են բերելու, որով գլխավոր շտաբի պետը կրկին դառնալու է Պաշտպանության նախարարի առաջին տեղակալը։

«Քաղաքացիական պայմանագրի» մեր աղբյուրների փոխանցմամբ, իշխանությունները նաև գրեթե ամռան ողջ ընթացքում նախատեսում են արտահերթ նիստեր ծրագրել և պատգամավորներին հատուկ զգուշացվել է, որ առայժմ իրենց հանգիստը չծրագրեն արտերկրում, քանի որ ամեն պահի կարող են պետք գալ խորհրդարանում, խոստացել են ընդամենը երկու շաբաթ օգոստոսի մեջ հատկացնել այցելությունների և ճանապարհորդությունների համար։ Մեր աղբյուրը նաև նշեց, որ այս նախաձեռնությամբ իշխանությունը ցանկանում է լուծել ընդդիմության հարցերը։

Նստաշրջանի ավարտից հետո, հաջորդ նստաշրջանը, որ պետք է գումարվի արդեն աշնանը, ենթադրում է, որ ընդդիմությունը կվերադառնա խորհրդարան։ Մինչդեռ «Քաղաքացիական պայմանագիրը» ցանկանում է այնպես անել, որ ընդդիմությանը խորհրդարան բերի արդեն ամռան ընթացքում և թույլ չտա ամռան ամիսները օգտագործել ընդդիմադիր ուժերի վերադասավորումների, ինչպես նաև իշխանության դեմ հակաքարոզչության ուժեղացման համար։

Ֆրանսիայի հրապարակից վրանները հեռացնելուց հետո փաշինյանական վարչախումբն անկեղծորեն ակնկալում է, թե ընդդիմությունը ի վերջո կվերադառնա խորհրդարան, մինչդեռ ընդդիմադիրները վստահ են, որ առանց հստակ օրակարգի խորհրդարան շուտ վերադառնալու դեպքում լուրջ խնդիրներ կունենան ինչպես իշխանական պատգամավորների, այնպես էլ հանրության հետ հարաբերվելիս։

Նարեկ Ավետիսյան