Խղճուկ և վախվորած․ Հայաստանն արժանի չէ այսպիսի իշխանության

Հայաստանի ներքաղաքական կյանքում առյուծ կտրող Նիկոլ Փաշինյանը միջազգային ասպարեզում իսկական վախեցած կատու է դառնում։ Քաթար այցելած Փաշինյանը հարցազրույց է տվել «Ալ-Ջազիրա» հեռուստաընկերությանը, և որքան էլ լրագրողը փորձել է նրանից պարզ և հստակ ձևակերպումներ կորզել թե՛ Ռուսաստանի հետ հարաբերությունների, թե՛ Ադրբեջանի հետ ստեղծված իրավիճակի մասին, Փաշինյանը, ըստ էության, ամեն կերպ խուսանավել է։ Մասնավորապես Ռուսաստանի վերաբերյալ հարցին հայտարարել է, թե Ռուսաստանը Հայաստանի ռազմավարական դաշնակից է, բայց նաև սերտ կապեր ունի Ադրբեջանի հետ։ Ըստ էության, Փաշինյանը ղարաբաղյան հակամարտության մեջ սլաքները փորձում է փոխել Ռուսաստանի վրա։

Ուղիղ տրված հարցին, թե ինչպես կդասավորվի Արցախի ճակատագիրը, եթե սահմանազատման հանձնաժողովը որոշի, որ Ղարաբաղը Ադրբեջանի տարածքն է, Փաշինյանը չառարկեց, որ դա անհնար է, և Հայաստանը նման քայլի չի գնա։ Խոսքը հայ-ադրբեջանական երկկողմ հանձնաժողովի մասին է, որը կարող է «որոշել» միայն Հայաստանի համաձայնությամբ։ Եվ բոլորովին կապ չունի, թե ով է միջնորդը՝ Մոսկվա՞ն, թե՞ Բրյուսելը։ Փաշինյանը հղել է եռակողմ հայտարարությանը, նշելով, որ 2020 թվականի նոյեմբերին Հայաստանի, Ռուսաստանի և Ադրբեջանի կողմից ստորագրված հայտարարությունը այն ժամանակ քայլ էր Լեռնային Ղարաբաղում բռնությունները դադարեցնելու ուղղությամբ։ Այսօր նաև մեկ այլ ուշագրավ իրադարձություն է տեղի ունեցել։

Ադրբեջանի անվտանգության խորհրդի քարտուղար Ռամիլ Ուսուբովն առանց սեթևեթանքների հայտարարել է, թե «Խաղաղության օրակարգը» որոշում է Իլհամ Ալիևը։

«Փաստն այն է, որ բանակցությունների բովանդակությունը և խաղաղության օրակարգը միանշանակ որոշում է Իլհամ Ալիևը։ Նախագահի խնդրանքով բանակցություններում այլևս չեն օգտագործվում «Լեռնային Ղարաբաղի հակամարտություն», «կարգավիճակ» արտահայտությունները։ Իլհամ Ալիևը ներկայացրել է տարածաշրջանում խաղաղություն, անվտանգություն և զարգացում ապահովելու իր առաջարկները. տարածաշրջանում խաղաղության և վստահության խթանում, Ղարաբաղյան առաջին պատերազմում անհայտ կորածների բացահայտում, ականազերծում, կապի և տրանսպորտի հաղորդակցության ուղիների բացում, մաքսային և սահմանային հսկողության հարցերի փոխադարձ ապահովում, համատեղ տնտեսական համագործակցության հարթակի ստեղծում և նմանատիպ այլ հարցեր բանակցությունների կարևոր թեմաներն են»,- ասել է Ռամիլ Ուսուբովը։

Այս ամենը վկայում է, որ Փաշինյանի հռչակած «Խաղաղության օրակարգը» իրականում կոչված է սպասարկելու Ադրբեջանի շահերը։ Նիկոլ Փաշինյանը պարզապես խամաճիկ է, ով սեփական իշխանությունը երկարաձգելու համար պատրաստ է ցանկացած հակահայկական գործողության։ Մինչդեռ Հայաստանում շարունակվում են խորանալ խնդիրները։

Տիգրան Խաչատրյան