Միանշանակ դեմ եմ Չալաբյանի կալանավորմանը և համոզված եմ, որ գործը շինծու է. Դավիթ Ամալյան
ՔԱՂԱՔԱԿԱՆՈՒԹՅՈՒՆՕրերս 160-ից ավելի մտավորականներ միացել են համաժողովրդական շարժմանը: Նրանք գտնում են, որ մեր երկրում անթաքույց խորանում են բռնաճնշումներն ու քաղաքական հալածանքները։
Երգիչ, երգահան, ՀՀ վաստակավոր արտիստ Դավիթ Ամալյանը նույնպես միացել է ստորագրահավաքին:
Վերջինիս խոսքով՝ հայ մտավորականը լռելու իրավունք չունի։ Այս ճակատագրական իրադարձությունների համապատկերում՝ սերունդների առջև արժանապատիվ կեցվածք պահպանելու մտահոգությամբ, կա միայն մի գերխնդիր՝ վճռականորեն կանգնել և կանխել երկրի կործանումը։
1or.am-ի հետ զրույցում, անդրադառնալով այս օրերին կատարվող ապօրինի ձերբակալություններին և, մասնավորապես, Ավետիք Չալաբյանի կալանավորմանը, Ամալյանը նշեց.
«Միանշանակ դեմ եմ Չալաբյանի կալանավորմանը և համոզված եմ, որ գործը շինծու է»։
Մեր հարցին՝ արդյոք տեղի ունեցող գործընթացների թիրախում Չալաբյանի ա՞նձն է, Ամալյանը պատասխանեց.
«Երկու տարբերակն էլ չեմ բացառում. կարող է և՛ հենց Չալաբյանի նկատմամբ հետապնդում լինել, և՛ նրա փոխարեն լիներ ցանկացած ուրիշը։ Ես, համենայն դեպս, քաղաքական այս պրոցեսներին չեմ խառնվում, ոչ էլ հասկանում եմ։ Ես միայն նպատակին եմ կողմ»։
Մարիամ Նալբանդյան
