Ղրիմի վանքը կընդունի հայ երեխաներին

Politnavigator.net-ը գրում է, որ այս ամառ Սուրբ Խաչ վանքի շրջակայքում նախատեսվում է կազմակերպել երիտասարդական ճամբար Հայաստանի և Ղրիմի երեխաների համար, որտեղ նրանք կսովորեն ազգային գրականություն, պատմություն, կրոն, արվեստ, կզբաղվեն սպորտով։ Ղրիմի հայերի երեխաների համար էլ Հայաստանում հետադարձ շրջագայություններ կկազմակերպվեն։

Նման պայմանավորվածություն է ձեռք բերվել «Ղրիմի օրերը Հայաստանում» միջոցառման ժամանակ հանրապետության պատվիրակության այցի շրջանակներում։ Ղրիմի կառավարության փոխվարչապետ Իրինա Կիվիկոն ասել է, որ դաշնային բյուջեի հաշվին վերականգնվել է հայկական ամենահին վանքի համալիրը, ինչպես նաև Թեոդոսիայի Սուրբ Սարգիս եկեղեցին։ Բացի այդ, ավելի քան հարյուր տարվա ընթացքում առաջին անգամ Սիմֆերոպոլում կկառուցվի հայկական եկեղեցի և մատուռ։ «Սա խոսում է այն մասին, որ Ղրիմում ազատորեն զարգանում են տարբեր ազգությունների ներկայացուցիչների ավանդական կրոնները։ Տաճարների կառուցումը մեծ նշանակություն կունենա Ղրիմի հայերի հոգևոր զարգացման համար»,- նշել է փոխվարչապետը։ Նա Հայ առաքելական եկեղեցու առաջնորդին նաև տեղեկացրել է, որ Ղրիմի իշխանությունները ուրախ կլինեն տեսնել Ամենայն Հայոց Կաթողիկոսին Ղրիմի հանրապետությունում։

Նյութը հրապարակման պատրաստեց Կամո Խաչիկյանը

www.1or.am