Ընդդիմադիր ուժերը Սյունիքում են, խորհրդակցություն են անցկացնում հետագա անելիքների վերաբերյալ

Երեկ երեկոյան ընդդիմությունը հայտարարություններ տարածեց, որ ռուս խաղաղապահները թույլ չեն տալիս իրենց մուտքը Արցախ: Դրան հետևեց ՀՀ ԱԳՆ «պաշտոնական» մտահոգությունը և պահանջը խաղաղապահներից՝ պահպանել 2020թ. նոյեմբերի 9-ին կնքած պարտավորությունները` անխափան կապ Լեռնային Ղարաբաղի և Հայաստանի միջև:

Միջադեպի վերաբերյալ 1or.am-ը փորձեց մեկնաբանություն ստանալ ԱԺ «Հայաստան» խմբակցության պատգամավոր Վահե Հակոբյանից.

«Մենք արդեն մեկնաբանություն արել ենք, Իշխան Սաղաթելյանը գրառում է արել: Նոր ոչինչ չեմ կարող ասել:  Հիմա մենք Գորիսում ենք, մեր երկու խմբերը Սյունիքում են, հենց հիմա խորհրդակցություն ենք անցկացնում, որ հասկանանք, թե հաջորդ քայլերն ինչպիսին են լինելու»:

Հիշեցնենք, որ Իշխան Սաղաթելյանը երեկ երեկոյան ֆեյսբուքյան իր էջում տեղեկացրել էր, որ Արցախի խորհրդարանական բոլոր խմբակցությունների ղեկավարների հետ իրենց հանդիպումը կայացել է Աղավնոյի անցակետում.

 «Նիկոլ Փաշինյանի և Իլհամ Ալիևի հերթական հանցավոր պայմանավորվածության շրջանակներում վերջիններս շատ արագ և միաժամանակ արձագանքեցին ԱԺ-ում ընդդիմադիր պատգամավորների հայտարարությանը, որ մեկնում ենք Արցախ և անցակետին փոխանցեցին Արցախ մեկնող քաղաքական գործիչների անունները՝ պահանջելով թույլ չտալ մեր մուտքը Արցախ»։

Մարիամ Նալբանդյան