Իշխանազավթում՝ օրենքով․ Փաշինյանը գրավում է ՏԻՄ-երը

Տեղական ինքնակառավարման մարմինների զավթումը դարձել է գործող իշխանությունների «իդեա ֆիքսը»։ Փաշինյանը, օգտվելով ստեղծված աշխարհաքաղաքական բարդ իրավիճակից, փորձում է ոչ թե ուշքի բերել Հայաստանը պատերազմում կրած պարտությունից հետո, այլ ավելի ամրապնդել սեփական իշխանությունը։ Իսկ դրա համար նա հրաշալի հասկանում է, որ կարևորը ոչ միայն իշխանության վերին օղակները յուրացնելն է, այլ նաև իշխանության ամենակարևոր հատվածներից մեկը՝ ՏԻՄ մարմինները, իրենով անելը։

Հայաստանի Ազգային ժողովը երեկ արտահերթ նիստում և արագացված ընթացակարգով հավանության է արժանացրել «ՏԻՄ» մասին օրենքում փոփոխություններին։ Երկու ընթերցումներին էլ կողմ է քվեարկել 57 պատգամավորներ՝ բոլորն էլ իշխանությունից։ «Պատիվ ունեմ» խմբակցությունը դեմ է քվեարկել, իսկ «Հայաստան» խմբակցությունը բոյկոտել է քվեարկությունը։

Օրենքի նախագիծը ներկայացրել էին իշխանության պատգամավորներ Վլադիմիր Վարդանյանը, Վահագն Հովակիմյանն ու Արփի Դավոյանը։ Նրանք փորձում էին համոզել, թե՛ ընդդիմությանը և թե՛ հանրությանը, որ ՏԻՄ մարմիններում որոշ դեպքերում հնարավոր է անիշխանություն և երբ չկարողանան նշանակել համայնքապետի պաշտոնակատար, իշխանության վակուում է առաջանում, որը ազդում է տեղի բնակչության կյանքի որակի վրա։

Մի կողմ թողնենք այն հանգամանքը, որ իշխանության վակուում առաջացել է վերջին շրջանում բացառապես փաշինյանական վարչակազմի ապօրինությունների հետևանքով։ Մասնավորապես այս օրենքը հստակ ներկայացվել էր Վանաձորում իշխանությունը յուրացնելու հարցը լուծելու համար։ Հիշեցնենք, որ քաղաքապետ Մամիկոն Ասլանյանը գտնվում է կալանքի տակ, և Փաշինյանը այդպես էլ չի կարողանում համայնքապետի պաշտոնակատար նշանակել, իսկ ավագանին չի կարողանում նիստ գումարել։ Եվ կարիք էր առաջացել օրենսդրական փոփոխություններ իրականացնել, Նիկոլ Փաշինյանին հնարավորություն տալ իր ցանկացած մարդուն նշանակել համայնքապետի ժամանակավոր պաշտոնակատար։

Այս օրենքը նաև մեկ այլ վտանգավոր հանգամանք է պարունակում, որ կարող են տևական ժամանակով ձգձգել համայնքապետի ընտրությունը ավագանու միջոցով, և վարչապետի պաշտոնը զբաղեցնող Փաշինյանը կարողանա ժամանակավոր պաշտոնակատարների նշանակումով տարիներ շարունակ յուրացրած պահել ցանկացած համայնքի՝ ցանկացած իշխանություն։ Ընդդիմությունը փորձեց մի քանի անգամ ուշքի բերել իշխանության ներկայացուցիչներին, մասնավորապես հայտնեց, որ Հայաստանը շատ ավելի կարևոր խնդիրներ ունի, քան այս պահին որևէ քաղաքում իշխանություն վերցնելը, սակայն «Քաղաքացիական պայմանագիրն» անդրդվելի էր։ Նրանք հանձնարարություն էին ստացել ամեն գնով ընդունել օրենքը և չափազանց արագ կազմակերպեցին օրենքի ընդունունը։ Երկրորդ ընթերցումը, նշենք, տևեց ընդամենը 5 րոպե։

Միքայել Ավետյան