Ուկրաինայի ԶՈՒ-ն որոշակի հատվածներում անցնել է հակահարձակման. Գլխավոր շտաբ
ՄԻՋԱԶԳԱՅԻՆ
Ուկրաինացի զինվորականներին հաջողվել է «ջախջախիչ» հարվածներ հասցնել ռուսական զորքերի խմբերին և որոշակի հատվածներում անցնել հակահարձակման։ Այս մասին մարտի 16-ի առավոտյան հայտնել են երկրի Գլխավոր շտաբում։
Նշվում է, որ ուկրաինական ավիացիան ինը գրոհ է իրականացրել ռուսական տեխնիկայի շարասյուների և զորքերի կուտակումների ուղղությամբ։
ԳՇ տվյալներով՝ «ռուսական զորքերի հիմնական ջանքերն ուղղված են նախկինում գրավված բնագծերի և պաշտպանական տարածքների ամրացմանն ու պահմանը»։
Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր Ուկրաինայի ապառազմականացման համար հատուկ ռազմական գործողություն սկսելու մասին:
Հեռուստաուղերձում նա ասել էր, որ հանգամանքները «մեզնից պահանջում են վճռական և անհապաղ գործողություններ, Դոնբասի ժողովրդական հանրապետությունները օգնության խնդրանքով դիմել են Ռուսաստանին»:
Ռուսաստանի ղեկավարի խոսքով, արյունահեղության ողջ պատասխանատվությունը կլինի Ուկրաինայում իշխող ռեժիմի խղճի վրա։ Նա ուկրաինացի զինվորականներին կոչ է արել չկատարել ուկրաինական իշխանությունների հանցավոր հրամանները, վայր դնել զենքերն ու գնալ տուն։
Ի պատասխան Արևմուտքը սահմանել է նոր հակառուսական պատժամիջոցներ: Մասնավորապես, դրա ներքո են հայտնվել մի քանի խոշորագույն բանկեր, ներառյալ «Սբերբանկ»-ը և ՎՏԲ-ն: Եվրամիությունը, ԱՄՆ-ն, Կանադան և մի շարք այլ երկրներ երկինքը փակել են Ռուսաստանի ինքնաթիռների համար: Մի շարք պետական ընկերությունների համար դժվարացել են օտարերկրյա կապիտալի ներգրավման հնարավորությունները: Պատժամիջոցներ են սահմանվել բարձրտեխնոլոգիական ապրանքներ Ռուսաստան մատակարարելու վրա:
